BLACK PINK引Fans文化襲港　踩高蹺玩動物大遷徙？

韓國人氣女團BLACK PINK前日（24日）起一連三晚假啟德體育園主場館舉行第3次世界巡迴演唱會《DEADLINE》，引嚟大批圈中人入場朝聖，好多藝人更係去睇VIP企位，實行為追偶像索性「與民同樂」，同其他觀眾又唱又跳投入睇騷。

有睇開韓星演唱會嘅Fans就會知道，VIP前排企位（俗稱「企坑」）猶如企咗入個大窿入面，要清楚見到偶像，唔少人會選擇「踩高蹺」，即出動10cm或以上嘅高踭鞋去令自己更高更有優勢，免得被附近體形高大嘅Fans阻擋視線。有唔少網友就Post出自己入場前趕去鞋店買特級高踭鞋，都算係做足準備，雖然高10cm可以睇清女神，惟Po主就自爆「演唱會沒開始這鞋已經夾到我腳都髀了」，場內亦有發現有人遺下增高鞋墊，有苦自己知。

另外，又有網友拍下尋日（25日）散場後開放翌日場排隊，大批粉絲拎住行李及大袋於場外飛奔，場面似足「動物大遷徙」般，危險又嚇人。原來唔少粉絲一連買下多場騷嘅VIP飛，因企位冇入場號碼，所以行得快就企得前，粉絲為求親親女神而排定聽日場次搶位，於場外瞓通宵一過夜，有網友就爆料於第一場入場時就差啲發生人踩人意外；同時亦有網友指唔少內地Fans趕住坐旅遊巴返上去過關回內地。

東網網站 : https://on.cc/東網Facebook專頁 : https://www.facebook.com/onccnews/