湯駿業岑寧兒演音樂劇　抒發大埔火災傷痛

由梁祖堯（阿祖）、湯駿業（AhDee）、邵美君和岑寧兒（Yoyo）主演的音樂劇場《偷偷記得》，昨晚最後一場，劇情講述一個人在無法避免突如其來又無聲無色的告別時，如何找到希望和面對這些回憶，適逢香港面對大埔火災這個巨大災害的時刻，要演繹如此貼近真實世界的故事，眾人都有不一樣又難以忘懷的感受。

身為編劇的阿祖表示，今次是想給大家一個抒發情感的出口，但沒想到他與團隊都一同被治愈：「我哋成班表演者、台前幕後都係香港人，大家都為大埔火災呢件事而十分難過，但係我哋正正就係喺呢個古仔裏面，都搵到我哋自己嘅出口。我亦都希望用呢一個諗法去帶畀觀眾，同大家同呼同吸一齊感受，同埋一齊去開解大家，陪伴大家，一齊去捱過呢段艱難嘅時刻。」

AhDee認同表示：「大家有啲情緒積住咗，今次可以透過呢個戲釋放出嚟之餘，同時亦令到我哋覺得劇場除咗搞笑之外，亦都可以有治愈、療愈嘅能力。」首度演出舞台劇的Yoyo，亦是被療愈的其中一員，她說：「好脗合本身最近要面對嘅呢啲情緒，幫助我作為表演者喺呢段時間去面對同埋處理呢啲感受，畀咗個出口我，同埋藉著我比較擅長嘅唱歌，去面對呢個生命課題。」網上不少留言都表示，聽到Yoyo演繹《細水長流》、《盡力呼吸》及《致明日的舞》等歌曲感到釋懷。

Yoyo表示：「演戲對我嚟講係好新嘅嘗試，學習過程中，容許自己更加敏感。雖然綵排演出不停重複著同一件事情，但每一晚面對唔同觀眾，再觀察自己嘅反應，原來都會唔一樣，呢個感覺實在十分深刻，亦令我多咗練習stay present，珍視當下。」阿君則遇上真情流露的觀眾兼好友，聽得最多的說話是多謝，讓觀眾排解了抑壓住的情感。「其中我一位社工朋友，佢一見到我，就攬住我係咁喊，冇講任何嘢，但我從佢嘅反應裏面，知道喺呢段時間佢行得唔容易，所以我都畀咗一個好深嘅擁抱佢，希望大家互相支持、互相鼓勵，繼續行落去。」

AhDee表示：「有個醫生睇完話呢個戲講出咗醫護人員嘅難處，講到佢哋嘅心聲。」阿祖則謂：「好坦白講，原本我唔係諗住講醫護，講放棄搶救，即係要同家屬去講放棄搶救呢件事，過程中提及好多醫護人員嘅傷痛感受，好多醫護人員同我講覺得被理解，同埋被看到佢哋嘅工作裏面嘅難處，佢哋嘅分享對我哋嚟講係好特別同埋好寶貴。」

阿祖表示在這個時刻演出，會帶出一個正面的訊息，並表示決定將售賣紀念品的錢捐助大埔火災災民。AhDee表示任何難關都可以一齊度過，阿祖亦稱關關難過關關過，只要一齊守護、幫助大家，心裏面有愛，幾難的難關都可以一齊捱過，正如音樂劇場中天使講的一句台詞：「我哋認識到大家，幫得幾多盡量幫，做得幾多盡量做。」

東網網站 : https://on.cc/東網Facebook專頁 : https://www.facebook.com/onccnews/