李佳芯挑戰普通話對白頻NG　信錯黎諾懿被迫「獻醜」

藝人李佳芯（Ali）離巢無綫後自組公司，雖然今年台慶頒獎禮有份憑《麻雀樂團》角逐視后，但最終10強不入，不少網民都指是「意料中事」。不過Ali的人氣依然甚佳，除了與老友黎諾懿在馬來西亞拍攝的劇集《義和》最近在當地播出，二人不時孖住宣傳外，Ali近日亦趁着節日探訪一班與疾病對抗的小朋友，跟他們玩遊戲、打氣，充滿正能量，被讚人美心善。

而日前她跟黎諾懿齊齊接受馬來西亞網台訪問，說到於劇集《義和》中，Ali跟劇中繼子全程都要以國語講對白，對她來說是新挑戰，她表示：「係第一次用國語演戲，原來講對白嘅時候係需要特別用力，音準要執得好正，我記得第一場拍國語對白時，我都NG得好犀利，仲要逐隻字去背，記住係咩聲調，抑揚頓挫，都幾吃力。」相反向來有「港普教父」之稱的黎諾懿在劇中就全程講廣東話，他笑指自己的國語自10年前開始停滯：「我係好鍾意講，可惜冇乜機會，因為呢套劇比較認真，我講普通話已經唔標準，仲要畀人一種好治愈、開心嘅感覺，我試過講畀導演聽，佢聽完覺得太開心，唔係太適合個角色嘅性格，所以謝絕我講任何普通話，有機會拍笑片嘅話，我都想成部講普通話對白，我覺得大家都聽得明。」Ali笑言:「希望字幕組聽得明。」

講到兩人相隔7年再度合作，會否覺得對方變化大？諾懿指覺得Ali變化不大，但兩人的信任增加不少：「7年前大家拍《BB來了》時啱啱相識，當時我成日同佢講：『你信我啦』、『呢單嘢搞得掂』，佢會問我：『係咪㗎』，依家佢好少問我，大家都成熟咗，係一個好完美嘅時機再一次相聚去拍一套劇。」Ali也自覺成長不少，今次面對全新環境及製作團製，認為是一個新開始。

所託非人 殘樣曝光

兩人老友鬼鬼，談到對方不能踩的底線，Ali指不能弄亂對方的頭髮，但諾懿否認：「錯喇，我經常都唔梳頭出街。Ali嘅底線應該係唔好搞到佢唔靚。」Ali趁機投訴對方：「記得佢之前叫我一齊拍《懿想得到》，叫我同佢去日本玩吓、放鬆吓，當時我拍完劇，狀態好差，個樣好殘，佢話會將我拍到好靚，一齊睇櫻花、飲咖啡，但睇番個節目，我成個人又累又攰，頭髮又蓬鬆，我真係信錯佢。」

東網網站 : https://on.cc/東網Facebook專頁 : https://www.facebook.com/onccnews/