蔡依林媽咪現身個唱變粉絲見面會　揭蔡父已另娶泰妻

台灣天后蔡依林（Jolin）一連3天假台北大巨蛋舉辦嘅個唱日前圓滿落幕，Jolin豪砸9億新台幣（約2.2億港元）打造成「愉悅宇宙」，大批大型道具包括巨型公牛、大蛇、金豬等傾巢而出，更因Jolin企巨蟒繞場一周嘅演出而成功引發全網焦點。估唔到原來台下一樣精彩，有觀眾於大巨蛋外偶遇現年70歲嘅蔡媽媽黃春美，蔡媽親臨現場力撐愛女，唔少粉絲一眼就認出氣質依舊、凍齡有成嘅蔡媽，紛紛上前要求合照，場面宛如小型粉絲見面會。

蔡依林先前表示，完成3場高難度演唱會要歸功於母親，係蔡媽日日關心佢飲食，早晚親自燉煮魚湯及雞湯，等佢順利補充足夠膠原蛋白同體力，先可以亮麗現身。而蔡依林爸爸2020年曾被報道與蔡母離異，蔡依林當時晒出同父親合影，稱讚爸爸係年輕人，顯見蔡爸同女兒們感情仍舊緊密。

同年台媒影到，蔡爸現身新住家，傳聞佢早年已與泰國籍女子另組家庭，2015年仲生下一子，與同父異母嘅蔡依林相差35歲，及後再添一子。蔡爸被拍到連續三日帶仔仔出門爬單槓、打棒球、睇醫生，生活愜意。蔡依林經紀人湯姆當時代為表示：「我跟蔡爸、蔡媽確認過了，他們已經離婚，長輩的私事我們就尊重不多做打擾。」

東網網站 : https://on.cc/東網Facebook專頁 : https://www.facebook.com/onccnews/