曾志偉自爆5度請辭　自嘲負責使錢：我係敗家仔

宣布卸任TVB總經理（節目內容營運）之職的曾志偉受訪，透露原來任職的5年內，先後5度申請職辭，且笑言：「今次終於成功嘞，接任人交由主席許濤決定，我自己畀咗少少意見，但冇畀人選。」至於他出任新成立的諮詢委員會召集人，他透露會向外求才，事關不想影響無綫內部人手調配。

回顧5年任職高層，曾志偉坦承至今仍未適應朝九晚五的生活模式：「況且主力做電視後，我好耐都冇休息過，台慶、港姐等大騷接住做，真係冇放過假，加上呢個職位唔可以亂講嘢嘛。（咁畀自己幾多分？）五十零分，麻麻哋，其實我唔擅長做管理，最鍾意都係幕前工作，嚟緊都會做番。（點解今次辭到職？）我講咗要陪仔女及家人，況且我都培育到一班可以接手嘅同事。（你任內令無綫業績轉虧為營喎。）我係敗家仔，負責使錢，初初乜都唔識就係大花筒，做落先識慳錢㗎。」

東網網站 : https://on.cc/東網Facebook專頁 : https://www.facebook.com/onccnews/