吳保錡夥鍾培生大埔派膠　「我攞咗個餐盒自肥」

被譽為百億富三代的鍾培生早前已公開表態不滿木製和紙製餐具難用，揚言要向全港市民「派膠」。他日前預告於年初四（2月20日）到18區派發可重用PP膠餐具套裝，當中在大埔區就聯同該區市民吳保錡一齊派膠。保錡在社交平台分享派餐具片段，寫道：「大年初四同 @khdcheung喺大埔派餐具No bullshit let’s go」，片中更笑言「我攞咗個餐盒自肥」、「有名嘅，要留念呀！」

鍾培生亦於今日在社交平台發片，談及「派膠行動」：「今日初四大家唔使初四咁嘅樣，我現在全香港十八區全民派膠。我懷疑這呢兩日班製造垃圾餐具的既得利益者，搵打手黎攻擊我。我作為一個愛國愛港嘅香港市民，一直都覺得香港應該仿效我們偉大嘅祖國，可以使用塑膠餐具，同時我派嘅都係可重用的塑膠餐具，係合法合規嘅餐具。竟然有一班出賣香港出賣祖國嘅賣國賊喺度搞搞震，我唔排除會進一步調查，係乜人做啲咁低劣嘅行為。」

鍾培生表示受到網軍攻擊：「我分別係Threads同埋Facebook受到攻擊。Threads 就離譜到全部都係新帳號，零追蹤者，成個帳號唯一嘅post就係攻擊我。最好笑嘅係好多個名係一模一樣，淨係後邊個數字唔一樣，可能計錢容易啲。至於Facebook就初二嘅晚上，係一張出咗三日嘅post，同時間一連串咁留言，明明有幾個新post，點解會搵一個舊嘅，相反新嘅就冇留言。我估係初一冇人做嘢，老闆可能好嬲係咁催，初二晚都要開工辛苦晒。」

鍾培生堅持向左膠說不：「我希望攻擊我打手，係一班擦鞋仔太監，如果你係收錢做嘢，你應該為你嘅辦事能力感到蒙羞。我有三個建議攻擊我嘅人。首先可能係中間抽水太多，正常做嘢無咁俹簁，除非係又貴又廢。第二可以考慮聘請我去攻擊我自己，相信效果也會好很多。第三，可以搵d有輿論影響力嘅，例如周顯、渾水、甚至係好多爭議性嘅才子陶傑先生。Anyways鍾培生 全民派膠 向左膠說不」。鍾培生於晚上發帖文寫道：「今日去晒十八區全民派膠，行咗差唔多50,000步」。