街拍神器Ricoh GR III　三軸防震加持

家陣十個有九個人都用手機玩Snap，雖然手機影相夠方便，不過相片質素始終仲未追到相機，而全新Ricoh GR III主打街拍，輕巧的機身跟GR Digital IV相若，但內裏卻配備一塊2,424萬像素APS-C尺寸感光元件，仲加入三軸防震系統，提供四級防震效果，機仔都有咁勁防震，影人、影微距、影夜景都唔再需要用腳架了。

GR III就採用一支28mm焦段F2.8光圈的定焦鏡頭，用上4組6片鏡組，而且支援微距拍攝，最近對焦距離僅有6cm，無論街頭影微細景物，抑或花展影花都大派用場，鏡頭可額外加配21mm鏡頭，擴展拍攝視野。新機的3吋104萬點屏幕支援觸控功能，機身旁邊亦加入全新功能鍵，按一下即可切換拍片模式，長按則會進入Wi-Fi和藍牙介面，能夠連接《Image Sync》手機App，預覽或過相話咁易。