都是口罩惹的禍 - 咦，你咪呀邊個？

戴口罩嘅日子似乎了無期😷，話咁快，我哋已經有一年嘅時間無見過大家嘅真面目。以前就話可以一眼睇到人哋嘅五官，諗兩諗就叫得出佢個名，加陣個個都得返對眼，三不五時都見到有人係街度認錯人或者認唔到人，哩種尷尬對日常社交真係帶嚟好多不便😓。
究竟點解戴咗口罩會令我哋咁難認到一個人，而認人又係認緊乜嘢呢？吾係心理學家一於同大家探討吓呢個情況！

❓「認人樣即係認緊啲咩㗎？」

當我哋辦別一個人樣嘅時候，我哋會透過特徵（features）同整體資訊（holistic information）去處理。特徵就係指平時所講嘅五官，而整體資訊就包括五官分佈（configuration）、裝扮同外觀。

❓「咁點解一個口罩令我哋認人差咗咁多呢？」

為咗搵出人類係用乜方法嚟辨別人樣，Tanaka 教授嘅研究團隊進行咗一個實驗，去了解參加者辨認面部特徵嘅敏感度。
實驗首先俾參加者睇研究面孔，再將研究面孔入面嘅鼻抽出嚟，將哩個鼻同另一個鼻，分別放入同研究面孔擁有相同或不同嘅五官分佈嘅照片，或者單獨展示俾參加者，叫佢哋辨認圖中個鼻係咪自己之前見過嘅嗰個。

研究發現，參加者較難喺單獨展示情況下，以單一特徵準確辨認出研究面孔個鼻，表示我哋對整體資訊嘅依賴。其中眼同嘴最為依賴整體資訊，因此得出個別與整體差別（part-whole effect），後者更有助辨認人樣（Tanaka & Simonyi, 2016）。口罩正正局限咗我哋資訊，得返最難認嘅一對眼👀，結果咪搞到認人都差咗囉。

❓「對眼難認都仲有其他嘢㗎嘛！」

無錯，除咗頭先講嘅五官（內在特徵 internal features）之外，其餘嘅就外在特徵 （external features）例如輪廓、頭髮等等，對我哋分辨人樣都有一定幫助。哩次Toseeb博士嘅研究團隊向實驗參與者展示完整面孔，測試佢哋可唔可以單靠內在特徵或者頭髮辨認。
雖然有唔少文獻都顯示，外在特徵有助辨認一啲唔熟悉嘅人，實驗結果發現，如果我哋本來以整體資訊學習某個面孔，單靠外在特徵未必可以顯著咁辨認返嗰個人（Toseeb, Keeble & Bryant, 2012）。所以就算口罩遮唔到頭髮都好，其實我哋都仍然好依賴內在特徵去判斷㗎。

🔎想知多啲，可以睇下面嘅文：
Tanaka, J. W. & Simonyi, D. (2016). The “parts and wholes” of face recognition: A review of the literature. The Quarterly Journal of Experimental Psychology, 69(10), 1876-1889.
Toseeb, U., Keeble, D. R. T. & Bryant, E. J. (2012). The Significance of Hair for Face Recognition. PLoS ONE, 7(3), 1-8.