MC張天賦眼鏡look演外星人　吊威也上半空「唔係AI 嚟㗎」

MC張天賦偶爾會戴眼鏡拍照，隨即得到不少好評。近日他推出新歌《無名氏》，以眼鏡look演外星人，更要吊威也上半空。「拍攝當日異常地凍，但係其他演員都冇得著好厚嘅褸，呢個真係好深刻嘅！同埋要吊威也啦，因為臨尾結尾一幕就係我需要飛上個天到回歸我嘅星球。」MC在社交平台出帖文透露「真係吊威也唔係AI 嚟㗎」。

新歌《無名氏》有別於過往的情歌、型格的歌曲，而是講述那些在日常生活中最平凡、最容易被忽略的瞬間：黑雨中突然為你撐傘的路人、替你付巴士車費的陌生人、輕拍你肩膀提醒拉鏈沒拉好的無名氏……這些「明明不需要待我好」的善意，默默地為每天匆匆忙忙的生活添上一絲溫暖，讓不問回報的溫熱在人海中繼續傳開。MC在帖文寫道：「大家嘅留言都收到哂，好開心呢首歌可以帶到溫暖同力量俾大家，係我作為一個歌手最想做到嘅嘢。收到好多留言話聽到喊，希望呢份溫暖唔會嚟得太沉重，或者，試吓睇埋個MV，你應該會笑返，畢竟，我同時都係一個稱職嘅Entertainer （真係吊威也唔係AI 嚟㗎）😌」。

而今次為何會一反平時唱開的情歌，想講不問回報的好人《無名氏》這個題材呢？MC 解說：「其實當初寫呢首歌嘅時候，都唔係太向情歌方向寫嘅，想以一啲其他嘅主題去做呢一首歌，當中亦都同Wyman 傾過偈之後就發現，咦！不如唔好寫咁多情情塔塔嘅嘢，或者唔好寫一啲愛情嘅嘢，寫下一啲其他感情類型嘅歌，於是乎就出現咗《無名氏》啦！」

MC表示雖然大家會對陌生人的溫暖舉動很感恩，「但係我亦都想提一提大家，可能呢一啲無微不至或者好細心嘅動作，其實身邊嘅人一直都有做到，但係可能因為佢係你身邊親嘅人，所以你無視咗呢啲溫暖，或者會無咗呢一啲感動嘅時刻！」。MC在現實中曾經在落雨時沒有帶雨傘，遇過好心的途人為他遮雨，他亦試過在的士拾到電話主動聯絡物主歸還。他認為這樣微不足道的小行為，能夠讓人感受到「小恩賜大美好」。

今年一開始 MC 就有不少好成績，他透露2026年的工作安排：「其實已經有新專輯做緊，亦都做緊新歌，而且基本上嚟緊應該每一個月都有演唱會。至於喺香港，應該就會係接近鄰近暑假嘅時候會有一個頗大嘅場地表演。」