娛圈單打︱最後一集悶到痹　靚佬自戀唔斷氣

拍足30年嘅《職業特工隊》系列，終於嚟到最後一集，影迷滿心期待，睇吓靚佬湯如何為自己嘅代表作畫下圓滿句號。兩年前上映嘅《死亡清算上集》，本欄曾撰文大讚靚佬湯奮不顧身上天下海，刺激驚險毫無悶場，點不知《最終清算》竟然來個反高潮！片長接近3小時，頭兩小時都係口水多過茶，悶到差啲瞓着！

故事延續上集，講述AI「Entity」失控，入侵各國核武器庫控制全世界，最後獨剩美國死守，只有靚佬湯先有能力拯救全球！佢老哥要潛入白令海峽、沉沒水底嘅俄羅斯潛艇，取回Entity嘅原始碼，再去末日種子庫將「毒藥丸」植入原始碼解除危機！

睇故唔好駁故，不嬲靚佬湯呢個打不死嘅特工，都係憑一己之力單挑全世界，幾誇張嘅情節大家都接受到，最緊要拍得好睇啫！可惜呀，今鋪靚佬湯好似食錯藥咁，頭兩粒鐘冇晒招牌飛車、跳樓跳崖、揸飛機等驚險場面，文戲多到暈，弊在情節東一忽西一忽非常零碎，仲偶然穿插咸豐年前幾集嘅情節，好聽叫勾起觀眾情懷，難聽叫東拼西湊炒雜錦！

本欄頭兩粒鐘都係苦苦支撐，唔畀自己瞓着，睇MI1-7都未試過，咪話唔大鑊！直到靚佬湯潛入深海先至醒一醒，但畫面暗沉，好快又起催眠效果！最好睇係最尾十零分鐘，靚佬湯徒手登上螺旋槳飛機追逐壞人，不過緊湊程度跟所有前作無法可比！

片中又見靚佬湯非常自戀，除咗將電影拍到長一長，擺明唔捨得剪短啲，更有相當長篇幅影住佢老人家除剩條底褲！喂，使唔使呀？都成六張嘢了，啲肉好鬆囉！

東網網站 : https://on.cc/東網Facebook專頁 : https://www.facebook.com/onccnews/