麥明詩產後首公開露面　正面反擊裕美：係我中人圈套！

「十優港姐」麥明詩今年3月與老公盛勁為正式成為人父人母，一直保護BB未有公開性別及樣貌。坐月後開始帶BB見朋友，跟前度林作母親王莉妮見面後，對方卻唔覺意晒出BB的正相，遭網民鬧爆樣，事後林作現任女友裕美直斥麥明詩為整件事的「始作俑者」，生B後一直發短訊邀約林母跟BB見面，更游說林母跟BB上契，做法令人費解「有病嘅人先會咁做」。

麥明詩今日（19日）出席活動，是她產後首次現身，對於裕美直斥她設局讓有分享症的王莉妮墮圈套，她表示最尾都是伯母的選擇：「可能當初同伯母溝通得不夠清楚，但佢好快就將啲相收番，我哋有好嘅關係，唔想再講太多，唔想再有圈套，係我中人圈套。」她表示跟伯母一直保持良好關係，當年參選港姐對方也給予很多支持和鼓勵，自己一直很尊重和尊敬對方，透露自己跟老公也不時會相約伯母吃飯見面：「自己同長輩嘅私人關係唔方便講太多，大家係關係良好。（BB上契未？）已回應咗，私人關係同關於BB嘅私人事唔講喇。（事件令人覺得否定咗林作同女友關係？）其他人嘅想法我預計唔到亦控制唔到，我只能控制到自己嘅感受同關係，我同好多唔同嘅朋友都保持良好關係，其他人嘅想法好難顧及太多，最緊要我同老公關係好，其實當日老公都在場。」

談到她努力保護BB不想曝光，但早前卻一家三口拍廣告，引來被網民揶揄，她解釋工作是必需的，但指大家誤會了：「其實拍攝嘅係另一位小演員，唔係我個BB，佢大過好多。（唔畀BB曝光？）社交媒體對年輕心智未成熟嘅人佢哋未Handle得到，加上我哋控制唔到外界。」問到若有廣告邀請會否替BB接？她表示暫時未有，將來的事情未知道，會待孩子長大後有自己的意願時再跟他商討：「至少現階段佢未能夠表達到自己嘅意願，我會選擇盡量唔畀佢曝光。」她表示會盡量保護自己小朋友的私隱和心理健康，希望讓孩子有快樂的人生。談到照顧BB，她笑言比想像中應付得到，加上有四大長老、老公和傭人姐姐的支援，像團隊一樣同心協力：「老公、媽咪、我同工人姐姐開咗個群組不時交流。（老公係神隊友？）佢好幫到手，上網睇好多教湊B片，佢好投入！（產後有冇出現抑鬱？）過程係開心，但都有辛苦嘅時候，情緒會波動，老公好好請咗假陪我，作為我嘅情緒支持，很快就康復，見到BB笑容會化解唔開心。」

談到有傳她跟好姊妹馮盈盈鬧不和，麥明詩笑言不明為何會有這種傳聞，表示已相約對方和其他朋友飯聚，又指孕婦正常都會減少出街，覺得真正朋友不用經常見，只要保持溝通，一切也在心中。

東網網站 : https://on.cc/東網Facebook專頁 : https://www.facebook.com/onccnews/