網上熱話｜愛貓男贈貓店長兩條「紅衫魚」 網友：特登唱錢俾貓貓 好有愛
香港地有著不少可愛迷人的貓店長，不只讓人想停下腳步打卡陪玩，更有部分愛貓人士會留下金錢給貓貓「買罐罐」。近日在社交平台Threads流傳一段閉路電視片段，從中可見一間深水埗鴨寮街的店門有一隻貓懶洋洋地趴著，及後一位男子慢慢走向貓店長，彎身在貓貓身旁放下兩張「紅衫魚」，然後摸摸貓頭；而貓貓亦向男子張口像叫了一聲，及後低頭看著自己的「罐罐錢」，而男子亦施施然離開。未久兩張「紅衫魚」便被店鋪職員發現，在場手指指和騎騎笑。影片到此完結。
樓主指，事發昨日(21日)早上，「個阿叔喺我哋鋪頭門口玩我哋隻貓，然後攞$500俾我，叫我幫佢唱散紙，我當然拒絕，冇諗到佢轉頭唱完散紙返嚟放低兩嚿水俾隻貓……」樓主亦上傳了貓店長的玉照，可見貓貓身旁放了不少零食的相片，相信兩張「紅衫魚」有用得其所。
▼即睇暖心時刻▼
網友大讚
影片吸引了不少網友回應，當中不少是大讚男子暖心行為，「叔叔好鍾意隻貓貓」、「多謝愛貓叔叔，呢個摸摸頭俾零用錢舉動好有愛」、「個叔叔擺低錢後再輕力摸兩下頭仔先走，佢真心錫貓貓」、「好Old school，真係好似細個啲親戚錫我哋就係醒幾嚿水我哋買嘢食。」、「鍾意到會特登唱錢，仲行返轉頭俾錢貓貓，阿叔，欣賞你」。
店舖不唱散紙起爭議
不過，亦有人斥責樓主沒有為男子「唱散紙」，「同你唱錢 > 當然拒絕。係咩心態呢？」、「今次心地唔好 但居然遇到好事 有冇令你反思呢」。而樓主亦有解釋指，「阿叔喺度玩貓，而我笑笑口任由佢玩，佢問我隻貓係咪我哋嘅，我點頭應咗，然後佢用佢一直揸住嘅$500直接同我講，你同我唱散紙；咁我同佢三唔識七，佢又唔係用問嘅方式，咁我點解要幫佢唱啊，係唔清楚對方意圖嘅時候邊個會幫陌生人啊，如果錢有問題，邊個負責啊」，最後亦不忘感謝男子，「我哋鋪頭都係好多謝阿叔咁大方請我哋隻貓食嘢，除咗阿叔，希望所有人都可以過得開開心心。」。
睇完新聞，記得追蹤am730以下平台，接收最新、最啱你嘅消息！
Facebook：am730 (https://www.facebook.com/am730hk)
Instagram：am730hk (https://www.instagram.com/am730hk/)
YouTube：am730 (https://www.youtube.com/c/am730video)
留言 3