Ivy So演技討好被瘋狂截圖 棄醫護參賽掹車邊入COLLAR

由恆仔（趙善恆）自導自演，加上COLLAR成員Ivy So（蘇雅琳）「處女下海」擔正的ViuTV新劇《和解在後》於本月27日開播後好評不斷，當中首次拍劇的Ivy So更得到網民力讚，表情多多又演技自然，再次虜獲一批人氣。其實Ivy由參加《全民造星4》時已是不少男網民心中女神，去到出道更憑住靚樣成為組合的「顏值擔當」，今次就睇下Ivy的「女神成長之路」！

現年21歲的Ivy於名校藍田聖保祿中學畢業，原本為了滿足屋企人對自己的期望而考入中文大學的護理系，不過從小就充滿表演慾的她最後都難以放棄「明星夢」，決定退學入行。

在《全民造星4》未開播之前，Ivy已成功憑住甜美樣子贏得觀眾歡心。當時以1號參賽的她一開始以跳唱英文歌曲《Good Time》贏過王家晴（Candy）的《紅綠燈》，成功晉身60強加入梁祖堯組別，但就被花姐彈爆，形容她「跳到似癲婆」及「能力不足就別選跳唱」，令Ivy傷心到喊，不過後來Ivy都不斷進步，最後在總決賽的《勿念》和《Conga》以總分20分排名第十完成比賽，更成功在比賽結束後被ViuTV邀請做女團COLLAR其中一員出道。

當時COLLAR的經理人Wing曾經在節目《我哋係COLLAR》爆料最初COLLAR是七人團，很多人認為Ivy實力遜色，但Wing認為她有明星特質和高人氣，決定讓她成為組合的第八個人，而Ivy亦未有令Wing失望，在唱跳表演方面愈做愈好外，今次更成功成為組合第一人踩入劇界演出《和解在後》！