鄭秀文讚楊偉倫似安仔　單眼皮精髓︰越睇越靚仔

賀歲片《夜王》，昨日（31/1）舉行宣傳活動，一眾演員黃子華、鄭秀文、何啟華、楊偉倫、楊偲泳等都有出席。近日電影將Sammi的舊歌〈星秀傳說〉重新編曲，成為「Shine一次版」，再找來一班東日夜總會公關小姐，以及經理楊偉倫(阿卵) ，熟客何啟華（阿Dee）參與拍攝MV，而一張大合照，就被網民發現，原來楊偉倫個樣，跟許志安有幾分相似，而昨日Sammi在活動上，亦表示認同。

提到阿卵似安仔，Sammi笑言︰「初初都唔覺，啲嘢就係咁，一講完再睇下，又有啲似，真係人言可畏。唔怪得之佢越睇越靚仔啦！」Sammi更補充二人相似之處，在於都是單眼皮︰「男生一單眼皮就會好似，係有種神韻。」而冇份拍MV的黃子華，就笑言下次可叫埋自己參與︰「我可以扮蘇永康！」

至於被指似安仔的楊偉倫，起初都不敢承認︰「佢靚仔好多，有冇問過安仔呀？」到得知獲Sammi認證，亦轉述安仔表示認同後，才敢承認︰「多謝安仔、Sammi錯愛，其實我都有見到留言，望番張相都覺有少少似。」隨後阿卵亦不忘自嘲，「因為見到Sammi先覺得我似安仔，但一拍落阿Dee度，我就係傻仔。」他又稱拍MV時Sammi非常專業。「佢一路都好型，但拍攝期間只要有眼神交流，佢就忍唔住笑出嚟。」至於MV中的粉紅色毛毛褸，原來是由廖子妤借出拍攝。「佢哋覺得我著得OK，但我就覺得自己似喜羊羊。」