MIRROR官方歌迷會成立「鏡粉」改名叫「MIRO」 魯生：呢件事有血有肉

MIRROR出道3年多，近日風頭一時無兩，去到邊都引來大堆鏡粉追隨，知名度更由香港延伸去到外國其他國家，認真巴閉！之前MIRROR就有預告過今個月就會成立官方歌迷會，等完又等去到今日終於有聲氣，更宣佈官方粉絲名為「MIRO」，以後唔再叫「鏡粉」喇！

官方歌迷會成立消息一出，一眾粉絲已經火速行動搶住加入，一年會籍為440港元，MIRROR更為MIRO準備了一盒超有心的迎新禮物，入面有會員證、專屬會徽襟章、精美立體拼圖擺設、一套12張珍藏版明信片同紀念海報，單看網站圖已經勁吸引，另外MIRO會員仲有不少著數例如訂購MIRROR演唱會及粉絲見面會門票，和訂購會員專屬商品等。

而魯生（魯庭暉）今日更在IG出PO賀MIRROR官方歌迷會成立，更坦言前前後後跟同事研究了很長時間，商討過很多背後細節，又形容「呢件事，有血有肉」，又指成個過程裡邊唯一令他輕鬆少少的一刻是聽到同事表示迎新禮物的樣板幾靚，最後又言「頭盔位，做得未夠好多多見諒」，可見他為今次MIRROR成立官方歌迷會付出很多心思。粉絲們亦有留言多謝他及團隊，有人更表示「等咗咁耐 終於有喇」、「感謝魯生 終於有家了」等。