娛圈單打︱仙女咁靚欠實力　失去光環難搵食

最近香港彷彿成為演唱會之都，尋日大家先至撲完BLACK PINK明年1月啟德演唱會嘅飛，另一韓流女團TWICE亦即將展開出道10周年巡唱，香港站定於年底啟德舉行。好啦，各位ONCE刨定搶飛攻略之餘，被譽為團中最美嘅台灣成員周子瑜亦好唔得閒，傳出單飛消息，仲話佢打算全面回歸台灣喎，係真唔係呀？

嗱，子瑜早前返回台灣老家，本來冇乜好奇怪，回鄉探親好正常啫。之不過，台媒放出風聲，指子瑜今趟回台並非探親咁簡單，而係密謀約滿JYP之後，為全面回歸家鄉鋪路。之所以有此消息傳出，皆因子瑜在台期間，曾與前華納音樂大中華區總裁兼知名製作人陳澤杉會面，陳曾一手捧紅蔡依林、孫燕姿等天后，兩人密會，引發外界猜測。

即係咁，子瑜不經不覺已經出道10年，當年只有15歲嘅清純妹妹，家陣已變成淺露性感嘅輕熟女，轉型都係時候。再講，K-Pop競爭激烈，新人輩出，經紀公司肯定唔可能再大灑金錢，喺出道10年嘅女團身上。莫講話TWICE始終未去到超一線，即使紅如GD，臨尾亦被YG冷待，連佢無辜捲入吸毒醜聞都愛理不理，最終GD心灰意冷轉投新東家。子瑜嘅級別無法可比，諗定後路亦是時候。

之不過，台灣粉絲雖然好歡迎子瑜回歸，但就替偶像擔心，認為子瑜最大優勢係天仙般嘅美貌，跳舞同唱歌實力皆係平平，一旦失去韓流光環，恐怕就會「露底」。呵呵，估唔到台灣人咁清醒喎。計本欄話齋，大家定啲啦，子瑜點都係得25歲女啫，未來充滿可能性呀！

東網網站 : https://on.cc/東網Facebook專頁 : https://www.facebook.com/onccnews/