葉蒨文發文罕談拍拖6年前度　「咁好都分手，好似我有病咁」

TVB藝人葉蒨文（Sophie）最近因《女神配對計劃》人氣高企，日前（7月20日）播出第七集，Sophie在camping期間自揭一個藏在心裡已久的「秘密」，原來她有6年沒去過旅行，理由與前度有關：「我同我EX一齊咗6年半，我係一路想佢帶我去日本，但就係一路等咗好多年都冇實現到……咁啱嗰陣疫情佢有啲困難，或者生意上佢心情各樣嘢都唔係好好，咁我就一路陪住佢啦。」這番說話經節目播出後在網上引起熱議，為她等不到期待已久的旅行而感到惋惜。

節目播出後，Sophie在IG發長文，剖白選擇分手的心路歷程，笑指很意外在節目的分享得到這麼多人的關注。「星期日嗰集女神配對計劃最深刻嘅，我以為會係同男嘉賓嘅互動，但係竟然係日本之旅嘅故事。我完全冇諗過節目組會剪落去，以為嗰一段冇乜同人互動嘅效果，對於其他人嚟可能比較悶嘅內容未必會剪接出來，估唔到，哈。講嘅時候我都算淡淡然，睇嘅時候我都冇乜感覺，但係當我見到大家嘅DM同埋評論區嘅留言，我忍唔住眼泛淚光，特別係嗰句: #東京之旅一早比一世遙遠。嗰一下自己好似係全世界面前講咗一樣一路放咗喺心入邊嘅嘢，然後有一種被明白、一種釋放咗嘅感覺，特別係見到有人DM同我講諗起自己嘅經歷，好明白呢種等待咗另一半好耐嘅感覺。我覺得除咗有人明白，甚至有啲感謝呢啲遠方網友嘅安慰。」

Sophie提到分手後曾有很多人「雪上加霜」：「我記得當時我嘅另一半係一位好好先生，大家都會覺得佢好錫我、對我好好，而且佢都係一個冇乜脾氣嘅人，所以一路都會覺得呢段關係一定係佢遷就我比較多。嗰陣時分手，好多人知啲唔知啲在心裏面會judge我：咁好，你都分手，好似我有毛病咁。好多出面嘅朋友唔係太熟嗰啲，知道我分手嘅呢個消息，都send message嚟一人一句、雪上加霜。大家都係識少少扮代表，安慰我嘅人真係得身邊了解我嘅三五知己同埋老師。」

Sophie直言曾在家人眼神中看到不解和批判：「我都冇解釋太多，講多無謂，我忠於自己嘅決定，我亦都知道自己點解要咁樣做。我記得當時剛分手的我坐咗喺一間西班牙餐廳入邊，面對住我嘅父母，佢哋看似輕鬆撩我傾偈，然後慢慢由淺入深、步步追問。屋企人問我點解要做呢個決定嘅時候，我睇到佢哋眼神嘅不解同批判。我覺得好難將啲六年半嘅感情逐一訴說，究竟用咩角度講？就算用咩角度都對呢件事唔公平。既然分開咗我都唔想影響佢哋對我個EX嘅觀感，我亦都覺得有時分開唔係邊一個嘅錯，我淨係知道嗰六年，我見到身邊嘅朋友會同另一半去旅行我都會好羨慕，我都會睇佢哋嘅分享去感受嗰種喜悅。」

最後，Sophie透露，希望將來男朋友可以和她去一次日本旅行：「面對一次又一次，日復日、年復年嘅期望落空，一直好努力、堅強咁去支撐住另外一個人，我知道個一種感受只會我自己最明白，於是當時我收起呢一種無人會明白我感受嘅心情，深呼吸一口氣，我最記得我講咗一句：『總之，我等咗六年嘅日本之旅，我知道自己再等唔到落去啦』。講完我努力將我眼框裝滿嘅淚水連埋啲食物一齊吞返落去，安安靜靜咁食埋呢餐飯，佢哋亦因為見到我呢個狀態佢哋都冇再問落去。有人問點解唔自己一個去？同朋友去？咁當然可以咁做啦，但係個重點並唔係去旅行。呢個日本之旅嘅等待係一種象徵，係一種我對於浪漫嘅期許同埋我嘅承諾！總之，下次如果我有男朋友我一定要佢同我去一次日本旅行！我想俾佢睇我着和服！我想同佢去環球影城！我想影好多靚相留低好多回憶！就係咁！」