MIRROR「生日群組」補祝Jer牛一　點解叫佢傻闌？

男團MIRROR成員柳應廷（Jer）上月生日，惟正日佢喺工作中度過，為備戰個唱而未有搞慶祝活動，估唔到相隔逾一個月，隊友呂爵安（Edan）搵埋盧瀚霆（Anson Lo）、邱士縉（Stanley）同李駿傑（Jeremy）為Jer慶生，簡單而隆重咁快兄弟賀壽，非常有心。

見Jer嘅慶生合照及短片中，蛋糕上附有一張紙巾，寫住「傻闌生日快樂」，而「生日群組」其他4子合唱英文生日歌時，仲齊齊大唱「Happy Birthday to 傻闌」，難得Jer一啲都唔介意，仲笑晒咁誠心許願，真係有兄弟就乜都得。至於點解叫Jer做「傻闌」，係因為Jer近日被揭將歌名《夜闌人靜》誤寫成粗口字而鬧出笑話，結果就多咗「傻闌」呢個花名，認真笑死。

東網網站 : https://on.cc/東網Facebook專頁 : https://www.facebook.com/onccnews/