幸得秋生唔嫌棄 林嘉欣呻被導演老公糟質

林嘉欣老公袁劍偉執導英皇電影《死因無可疑》開鏡，嘉欣以演員身份，與黃秋生、湯怡、陳家樂等出席，英皇集團主席楊受成亦現身支持。
秋生表示戲中跟嘉欣演夫妻，由細到大很仰慕對方，但他好靚仔又「低低地」，更笑謂每日開工要望住嘉欣10分鐘先入到戲。他說：「呢部戲我無乜對白，加埋唔夠10句。」問到今次是否類似《人肉叉燒包》的變態角色，他說：「令人覺得似啫！我都話唔會再演呢啲角色。」
嘉欣爆首日開工要拎住個袋打秋生，豈料忘記了袋中有個鋼水壼。秋生即說：「個頭腫咗呀！」嘉欣笑謂將事件告知劉青雲即獲讚醒目。對於戲中造型相比真實的年齡較老，嘉欣謂對演員來講感覺好玩，不過為了角色專登留了白頭髮兩個月，也不塗潤手霜及做面部護理，所以幾大挑戰。她說：「導演（指老公）咁樣糟質都算，秋生都唔嫌棄我，你知佢對演戲藝術幾高要求啦。」秋生聞言即說：「你應該同老公講，咁搞法？返唔到轉頭喎！」對於經常要含情脈脈望住嘉欣，可會擔心袁劍偉呻醋？秋生說：「我傻㗎嘛！佢叫我演嘅。」（攝影：鄧國良）