卡塔爾特集｜富貴明珠｜運河奇幻騷
卡塔爾世界盃日記 Day12
足球小將再創奇蹟，超神奇！
摩洛哥都好值得首名出線
今日去咗多哈最富貴之地——卡塔爾明珠（Pearl Qatar），呢度係個人工島，分開好多個唔同style嘅區域，佈滿豪宅、五星酒店同高級餐廳，馬路上不時有超跑駛過，海灣停滿遊艇。人工島嘅概念仿傚咗杜拜棕梠島，之所以叫「明珠」，因為從空中鳥瞰，人工島嘅形狀就好似一粒大珍珠。
海旁食tea後散步到島上最繁忙嘅中心廣場區，呢度食肆林立，而且充滿歐陸風情，好似暫時離開咗中東咁。
趁日頭炎熱遊人不多，有小朋友喺大路上踢波嬉戲，到入黑呢度就會變成人山人海。廣場一帶掛滿世界盃裝飾，包括決賽周隊伍嘅旗幟。
一直漫步到半月形沙灘，消磨咗一整個下午。橋上有外國人跑步，沙灘有美女曬日光浴，有人泛舟海灣，加上「鹹蛋黃」金光映照，倍添愜意。
其後我哋搭兩站巴士去到必去嘅運河景點，五顏六色嘅燈光打喺兩旁大廈牆身上，景色奇幻迷人。原來今晚有激光表演加花艇巡遊，運河兩岸入黑後漸漸迫滿遊人。
揭開序幕嘅係運河空中飛舞，女舞蹈員與男伴配合，飛上天空翻騰轉圈，音樂悠揚，燈光變幻，襯托翩躚一舞，賞心悅目。
緊接係激光匯演，運河上空一時紅粉一片，一時藍光四射。
之後上演帆船飛升，熒光帆船隨地球升上半空飄蕩，充滿童話色彩。
最後有花艇巡遊。睇咗一陣，夠鐘開波，揀咗間韓烤店邊食邊睇第二愛隊克羅地亞，最終呢組比利時出局，摩洛哥首名出線，佢哋質素好高，尤其有薛耶治壓陣，絕對值得踢走垂垂老矣嘅歐洲紅魔鬼。
之後轉場去到最旺區域，剛啱又有高蹺巡遊，極之熱鬧。搵咗間有賽事直播嘅餐廳，坐低撐日本，結果四隊波合演最扣人心弦嘅兩場互動賽事，出線形勢不斷轉變，由最正路嘅西班牙同德國雙雙領先，到日本射入超級世界波，神奇三分鐘連入兩球，再到哥斯達黎加反超前，令賽前揸住七個得失球、坐定粒六嘅西班牙忽然死亡；再到德國反勝，日本必須頂到最後一秒，睇到人好肉緊。
完場雞聲一響，當堂大叫出來，日本得咗啦！肯肯定其他顧客當咗我哋係日本人，哈哈！
是日賽果：
克羅地亞 0:0 比利時
加拿大 1:2 摩洛哥
哥斯達黎加 2:4 德國
日本 2:1 西班牙
By港佬
港婦漂流：
https://www.facebook.com/kennis.chiangmai