TVB配音員疑用同事資料借錢 藝員宋懿芳變擔保人被追債

TVB藝人、男團SUPER TIGER成員宋懿芳（Ken）昨日（5月18日）於Instagram貼出多張WhatsApp對話截圖，指近日收到追數訊息，對方聲稱他是「TVB配音組陳欣」的擔保人，令他無辜捲入「借錢」風波。宋懿芳澄清並不認識陳欣，並表示已經報警。

追數人以WhatsApp聯絡宋懿芳，稱呼他「宋生」、「宋懿芳」，又表明是「TVB配音組陳欣」留下他的聯絡，又寫道「你要玩野（嘢）就陪你玩啦宋懿芳」、「唔好後悔」…… Ken表示沒有簽過任何擔保，亦不會代為還錢，而且已經報警處理。

Ken撰文公開請陳欣盡快處理自己的問題，「首先我並唔認識你，我亦唔清楚你係點樣拎到我嘅個人資料，仲將我寫成你嘅聯絡人、擔保人。上網一查發現，原來你係慣犯，之前都試過一次盜用其他人嘅資料，自己借完錢就玩消失。如果有認識陳欣的人，請通知他盡快出嚟處理自己的問題。」

Ken亦有說話給追數人：「追數嗰位…你確實係有我嘅資料，但我從來冇簽過任何擔保，並唔認識你口中的配音組陳欣，所以你唔使諗靠恐嚇可以喺我呢度拎到一分錢。如果靠嚇可以追得數，咁你個陳欣一早還咗錢。與其喺度浪費時間，不如早啲用法律嘅途徑追訴陳欣嘅欠款，香港係法治社會，處理問題應該用法律途徑而唔係爛仔方法。」

陳欣加入TVB多年，曾為《獎門人》旁白和報幕台聲，亦曾在TVB配音比賽節目《好聲好戲》任主席評判。

兩年前，資深配音員龍天生亦曾被捲入「借貴利」風波，當時他在其工作室Facebook貼文，表示近日收到恐嚇電話及恐嚇信，「早前做咗個《好聲好戲》節目，同一位知名配音員同場。點知對方曾借貴利，借錢人搵唔到佢，竟然諗到恐嚇我，先在演藝人協會門外貼大字報，再加恐嚇電話，再寄恐嚇信到我屋企，最離譜就係在我所住大廈派大字報及在Facebook貼誹謗貼文。」