全場歡呼！嘉應高昇18連勝破精英大師紀錄！

今日全個馬場都係講緊「嘉應高昇」，嚟到第8場戲肉女皇銀禧紀念盃1400米一級賽，呢匹應屆馬王臨場獨贏係1.0倍擂台躉，排3檔起步，好快就跟到第2位走，之後到直路，潘頓騎住「嘉應高昇」拍上來過放頭馬「」，今場增程潘頓唔敢托大，都有認真推送，「嘉應高昇」一如過往交出極強加速力，去到最後百幾米，雖然已經甩開對手，但潘頓都有騎多幾步，結果以1分19秒36破紀錄時間，完成18連勝創舉，打破咗21年前「精英大師」紀錄，一眾打氣團揮動旗仔同埋Banner，全場雷動呀~「嘉應高昇」贏今場G1，又執多728萬頭馬獎金，大豐收呀！

賽後，見到潘頓走去敲鐘，代表踏入新里程，潘頓亦講笑話策騎指示係破紀錄，仲話對於今場18連捷，以牠的實力絕對是理所當然，而今仗牠走勢也是很輕鬆，順着賽事節奏發揮自如，能夠完成這個歷史性時刻，所有榮耀盡歸於馬匹身上。至於馬主梁錫光對「嘉應高昇」能夠破紀錄感到非常開心，自己都好激動，眼泛睙光呀。

練馬師希斯賽後表示終於可以鬆返一口氣，今日見到個場地咁快，都有信心「嘉應高昇」可以破到場地紀錄時間，潘頓都有聽策騎指示，比平時騎多咗。而練者表示自己都訓練過好多連續700幾日無贏嘅馬，所以可以有「嘉應高昇」連贏742日係好好彩，加上「嘉應高昇」仲要係今日場上最後生嘅一匹馬，仲係一隻BB，希望可以將呢個連贏走勢繼續延續落去。而「嘉應高昇」之後會跑二級賽短途錦標，再跑主席短途獎，之後就會返從化，為衛冕珠穆朗瑪峰錦標作準備。

是場跑第2、3名，係老對手「驕陽明駒」及上次董事盃跑第2的「金鑽貴人」。

東網網站 : https://on.cc/東網Facebook專頁 : https://www.facebook.com/onccnews/