回憶中嘅懷舊本土美食 龍鬚糖竟然先得第五名！？
你回憶中有冇呢啲美食？
「集體回憶mode：想當年你最喜愛美食」
大家童年入面都一定有最鍾意嘅零食、大個再食返都會記起細個嗰段回憶。宜家雖然好多人都特登買外國零食，但總會有D時候，會突然懷念某種回憶裏嘅味道。
而好多呢啲關於味道嘅集體回憶，都隨住時間過去慢慢消失。今日DailyView就幫大家整理咗10大香港懷舊嘅美食，呢個時候大家腦海入面浮現出嘅又係邊一樣食物呢？
image source:IG/cherry.slife
10 無食過都有聽過叮叮糖
因爲以前賣糖個時，要用錘鑿碎盆糖塊所以叫做叮叮糖，通常喺路邊見到都係同糖蔥餅一齊賣。唔似宜家嘅零食包裝得繽紛華麗，叮叮糖多數用一個普通透明袋裝住，人手製造同鑿碎，每一粒都唔一樣，雖然樸素但係相對地都唔似宜家嘅糖，又加色素，又有防腐劑。講起都想買返包嚟食呀！
image source:IG:pokeestore
9 無香蕉嘅香蕉糕
香蕉糕只係佢個網名，真正嘅香蕉糕原來係無香蕉，只係因爲個樣望落似香蕉，而食落嘅香蕉味係來自於材料之一嘅香蕉油。以前都係好受歡迎嘅小食，但好多呢D傳統小食都被進口食物取而代之，變成「老一輩」先食嘅點心。當然仲有一個原因係因爲好多懷舊小食宜家已經無咩人做喇！
image source:IG/supersupergirlhk
8 世界獨有飛機欖
呢個名就好似傳説一樣，細個聼呀媽講起飛機欖，都覺得好神奇！可能係世界上面唯一一個會掟上樓俾你嘅嘢食！用鹽、甘草、陳皮、丁香、玉桂醃嘅欖，最特別就係佢嘅「運送」方式，嗰個年代香港啲樓無宜家咁高，望住飛機欖飛上屋企，好似睇雜技表演咁，可惜以後就只可以睇以前嘅片回味喇。
image source:IG/ting_ki
7 一啲都唔簡單嘅芝麻卷
曾經係飲茶常見點心之一嘅芝麻卷，因爲一卷卷好似菲林，所以仲有人會叫佢做菲林卷，但因爲工序多，又賣唔貴，宜家好多茶樓都已經無做喇。想食都要搵下香港僅餘嘅一啲傳統糕餅舖。菲林因爲科技被淘汰，芝麻卷都一樣因爲發展，慢慢變成大家回憶裏面越嚟越少見嘅小食。
image source:IG/littlefunkitchen
6 夏天小確辛大菜糕
大菜糕可以話係咁多種小食入面，最平、最簡單嘅一種，做法簡單，夏天消暑就啱哂。就咁食比較清淡，亦都有好多唔同食法，一般比較常見就係加蛋花、花奶、生果。大菜糕成分就係大菜絲，水同冰糖咁簡單，根據個人喜好可以加入其它材料。以前小朋友食呢啲純天然成分做嘅小食，宜家就幾乎全部加工食品，果然係時代的眼淚呀！
image source:IG/meowkaylie
5 講求手工嘅龍鬚糖
以前同樣好多路邊擺檔賣嘅龍鬚糖，宜家通常都係每年一次年宵市場先見到，而且大部分都係已經整好現成嘅。對好多人嚟講，細個第一次見到龍鬚糖製作過程，真係覺得好神奇，睇到眼都定埋！將麥芽糖膠不斷來回拉到變成千絲萬縷嘅龍鬚，睇表演又有得食，懷舊味道同人情味永遠都係機器無辦法取代嘅，希望呢種手藝唔好失傳啦。
image source:IG/manmandylam
4 紅到拎米芝蓮嘅狗仔粉
六、七十年代就出現嘅街頭小食，到今時今日拎到米芝蓮，無食過真係唔好話你係香港人。以粘米粉做成嘅狗仔粉，加上蝦米、菜脯、豬油渣等，簡單一碗，飽肚又好味。好多遊客嚟到香港都會特登去朝聖，不過大家講得出名賣狗在粉嘅鋪頭都得一兩間，真係要好好好珍惜，唔好令佢又變成集體回憶呀。
image source:IG
3 唔好以貌取茶果！
講到傳統手工糕點，茶果一定唔少得。記得以前細個去到長洲、大澳，一定會見到D婆婆係路邊賣自家製嘅茶果，有鹹有甜，任君選擇。呢啲傳統小食特別之處就係好多時做嘅老人家都無跟住特定分量，所有都係憑經驗同感覺，所以每一間做出嚟都各有特色。
image source:IG/ap_aptk
2 唔係長洲糯米糍！
講到糯米糍，好多人諗起嘅都係呢幾年成行成市嘅芒果糯米糍，原本係長洲特色食物，但開下開下，宜家周圍都買到。不過如果講到傳統糯米糍，你又有無印象呢？傳統糯米糍一般有花生、紅豆、芝麻味，簡單嘅材料做出傳統又溫暖嘅味道，每一粒都充滿人情味。
image source:IG/jenjen.food_zi
1 你一定食過嘅砵仔糕
砵仔糕真係好多人細細個嘅回憶，經過街市，或者路邊都有有攤檔賣。白糖、黃糖、多豆、少豆，相信每個人都有自己最鍾意嘅款式。以前想買個砵仔糕話咁易，但宜家小店越嚟越少，突然間想食都真係要特登搵。不過有幾間出名嘅老店，到宜家都仲有賣，想食嘅話不妨去回味下記憶中嘅味道啦！
image source:IG/susanasansan
分析說明：
本研究資料分析時間範圍為2018年05月03日至2019年05月04日，共一年。
網路大數據系統觀測港澳地區上萬個網站頻道，包括新聞頻道、Facebook、Instagram、Twitter及各大討論區、部落格等，針對討論『香港懷舊美食 』相關文本進行分析，並根據網友就該議題之討論，作為本分析依據。
本文分析之結果，非參考投票、民調、網路問卷等資料，名次僅代表網路討論聲量大小，不代表網友正負評價。