減肥心理學 - 心理減肥法？
上兩個post 同大家介紹咗肥胖嘅心理因素同其他因素。今次同大家探討一吓喺心理學層面，又有乜方法可以幫人控制體重呢？
1️⃣ 改變食物容器
首先，同大家介紹一個你應該唔會諗到嘅方法 - 就係喺裝食物嘅器皿上面做一啲改變。學者指出當人食嘢嘅時候，傾向相信自己嘅眼睛，透過觀察食物嘅份量嚟衡量自己食咗幾多。👀
所以如果用一個細嘅盤嚟裝野食，裝到滿滿，大腦就會誤以為我哋已經食咗好多，會下指令提醒我哋已經食飽咗，食量就會不知不覺咁減少。另外，原來碗碟嘅顏色都關事，研究發現紅色相比藍色和白色都對減少食物攝取量有幫助。但值得留意嘅係紅色並非令我哋有飽足感，而係帶有警示嘅意味。令我哋食緊唔健康嘅食物嗰時產生迴避嘅動機，因而減少食物攝取量，呢種情況係食健康食物上並無作用。🍚
2️⃣ 自我預言方法
有心理學嘅研究發現，當你相信自己能夠減肥成功同想像多啲自己瘦咗，可以幫我哋減肥。透過反覆鼓勵，係可以改變人嘅意識，從而再去改變行為。🗣
根據弗洛伊德嘅潛意識理論，潛意識唔會分真假，只要我哋喺腦海入面輸入一啲信息，大腦都會照單全收收。所以如果我哋每日都俾啲心理暗示自己，潛意識接收到呢啲暗示，身體可能就會跟住受影響，令我哋嘅行為都朝住呢個目標出發。💪🏻
3️⃣ 唔好過度節食
大家都知過份節食容易令人體重反彈，食欲壓抑到極致會最終爆發失控。節食唔單止令人體新陳代謝速度變慢，禁止食某啲食物仲會增加咗人對呢啲食物的嘅欲望。😍
Higginson 研究團隊發現，節食嘅人平均體重增加比未節食的人仲多。咁係因為大腦會因為飢餓而認為食物供應不足，因而儲存更加多脂肪嚟為身體提供保險，令人更加肥。🤯
以上就係一啲利用心理學減肥嘅方法，唔知你有無試過呢？留言分享我哋知呀！🤩
🔍想知多啲，可以睇以下嘅文：
Reutner, L., Genschow, O., & Wänke, M. (2015). The adaptive eater: perceived healthiness moderates the effect of the color red on consumption. FOOD QUALITY AND PREFERENCE, 44, 172–178.
Higginson, A. D., Mcnamara, J. M., & Dall, S. R. (2017). Towards a behavioural ecology of obesity. Behavioral and Brain Sciences, 40. doi:10.1017/s0140525x16001436