林作疑列10大條件　閉門同鍾培生打100萬擂台

一向愛抽水博出位嘅林作因為一句「抄我100萬？」，結果辣㷫「工廈大王」孫仔有百億富三代之稱嘅鍾培生，引發一場搏擊擂台賽，鍾培生豪言只要林作肯上台，無論輸贏都會送出100現金畀對方，正當一眾網民食住花生等睇戲時，林作採取顧左右而言嘅態度，一直都冇正面回應係咪上擂台，搞到網民話佢冇膽縮沙，催促佢上定唔上快啲畀個答案。呢日林作喺社交網發文：「我的條件，絕對不會這麼苛刻。」並列出10大疑似上擂台條件。

林作講明唔會開出上述咁苛刻嘅條件，即係呢啲規矩唔關佢事，相信都係好友或網民向佢提出「意見」，而佢亦未有明確答應肯打，不過一眾等食花生嘅網民已經等唔切，不停留言鬧林作，話佢怕死淆底先會講咁多之外，仲好多人都覺得佢輸梗！

而鍾培生方面亦有回覆林作呢個發文，話自己都係學咗4個月就打第1次擂台，唔介意畀夠半年對方練習，仲拒絕閉門作賽要求：「香港人嘅事一定要全香港一齊睇。」最爆嘅係佢唔係得個講字，表明已經send咗合約畀對方，星期一就可以簽！究竟林作最終會唔會簽約好快就會知結果。

東網網站 : https://on.cc/

東網Facebook專頁 : https://www.facebook.com/onccnews/