獨家直擊！鄧兆尊拖脫脂三奶銅鑼灣出巡 女方手腕現血痕出高招誓坐正

上場唔夠一年的單親G奶三奶帶住一對仔女投靠鄧兆尊，依然跑贏大婆同二奶，疫情下兆尊只與三奶出雙入對，早前去沙灘碌地沙情慾大放縱後又被影到當街揸籮，以往陪女友分班制已蕩然無存，兆尊幾乎日日G奶日。有指三奶非常進擊，為迷惑兆尊誓坐正奇招盡出，近月瘦身廿磅脫脂上陣，日前她與兆尊現身銅鑼灣，已變成薄切豬扒，更刁橋扭擰要兆尊邊行邊氹。為一塊半肥瘦豬扒放棄整個肉食市場，兆尊千年道行一朝喪。

撰文、圖片：東方新地

鄧兆尊為三奶冷落其他女友上節目笑騎騎認食豬扒

兆尊在疫情下只掛住與三奶增進感情，本刊記者近半年見他頻頻與三奶出雙入對，以往只集中在灣仔區活動的兆尊，為三奶走勻全港，早前二人勇闖南灣與陽光玩遊戲，面對進擊的三奶姣騰騰掃髀罅，兆尊根本無力招架，之前話過與女友不會公開親熱的他，更情不自禁破晒戒拖晒手又錫膊頭。為博新三奶一笑冷落其餘兩C，兆尊大細超到極點。

南灣情慾戰一役後，三奶人氣急升，當日水著look令G奶現人前之外，白滑肥美身材加豬腩肉更成為焦點，過往兆尊多位女友皆屬「圓潤型」，三奶更把指標推上頂峰，早前兆尊帶埋三奶接受好友苑仔(苑瓊丹)訪問，苑仔竟不留情面當住三奶面前笑兆尊「鍾意食豬扒」，不過正值熱戀期的兆尊毫不介意，兼笑容滿面甜到漏回應：「扒有好多種，靚嘅擺喺屋企，係靚豬扒嚟！」現場的三奶未有反枱，但就扁嘴向兆尊撒嬌不滿被叫豬扒，而且笑得好牽強。

脫脂三奶激瘦當街扯煙 手腕驚現血痕

據知兆尊向來揀女喜歡有肉地有揸手，不過三奶對被封豬扒卻非常介意，為打破常規甩豬扒之名，近月她刻意減磅，知情者透露：「兆尊識三奶時就係睇中佢肥嘟嘟白雪雪，而且為人熱情性格好相與，點知戀情曝光後，三奶好在意人哋話佢係豬扒，成日向兆尊詐型，近幾個月仲搵盡辦法減肥，最快就梗係食減肥藥同節食啦，依家瘦咗成個碼，有腰有波，對腳都幼埋。三奶身形變索，兆尊食得肥膩嘢多覺得好新鮮，三奶得寵程度再升級，佢好識喺兆尊面前一哭二鬧三上吊，話大婆Carmen同二奶車厘子點樣夾埋排斥佢，又話自己單親帶住小朋友受盡白眼，個個都話佢做三奶最蝕又冇名份，不斷迫使兆尊疏遠其他女人，仲話好想幫鄧家留後，係人都睇得出佢好工心計，目的都係想坐正。」

限聚令已由二人增至六人，兆尊其實可以合法地恢復四人行，不過三奶繼續坐大，日前兆尊現身銅鑼灣鬧市，同行的三奶身形變薄脫脂成功，不過大媽味依舊濃，期間三奶突然耍脾氣，與幾個月前個小鳥依人樣判若兩人，兆尊又攬腰又搭膊頭當街氹女，這個場面絕無僅有。行經便利店，三奶煙癮發作要兆尊入去買煙，買完即搶住叼入口，二人在便利店門口旁就地脫罩扯煙，現場所見，三奶比兆尊扯煙扯得更狠更狼，完全不理形象。本刊記者更發現，當日三奶長時間把雙手翹疊於胸前，其後與兆尊走入後巷食煙時，其右手手腕驚現多條血痕，左前臂亦有多個血紅呈圓形的傷痕，三奶似乎唔係省油的燈。