娛圈單打︱北上被斥冇良知　屈得就屈人都癲

欣宜助陣內地節目《歌手2025》，卻臨陣受傷退出。

一度成為「失蹤人口」嘅欣宜終於返嚟啦！內地節目《歌手2025》宣布，欣宜成為節目第七期補位歌手，早前已飛抵長沙錄製節目。見到佢收身成功，神采飛揚，粉絲倍感安慰！可惜吖，人算不如天算，欣宜忽然受傷，無奈退出節目。

部分香港粉絲就大聲叫好，皆因佢哋對於欣宜選擇喺內地復出，感到十分失望喎，仲話希望佢有「良知」，唔好只為錢而北上。嘩，連良知都搬埋出嚟講，使唔使呀？留喺香港塘水滾塘魚就有良知，衝出去更大嘅舞台就冇良知，呢種咁偏頗嘅邏輯，恐怕「黃絲」先至諗得出！

Anyway，仲有好多粉絲係好理性嘅，對於欣宜選擇喺內地復出非常尊重。講真，香港市場咁細，欣宜早已攞咗女歌手金獎，兼且紅館個唱都開埋，久休復出，梗係要搵啲新挑戰啦。北上見識吓十幾億人口嘅神州大地，拓闊自己嘅事業版圖，點睇都係聰明嘅決定。

話時話，大家都好關心欣宜嘅感情狀況，尤其之前傳佢喺加拿大秘密產女，究竟堅定流，到今時今日都未有答案。之但係欣宜懶理是非，精神爽利咁喺內地「出巡」，有粉絲喺旅遊區撞見欣宜，邀請佢一齊拍片打招呼，佢亦冇托手㬹，可見心情極靚，早已走出抑鬱症陰霾。

諗番欣宜出道之初，「網暴」排山倒海而來，既踩佢靠父母，又批評佢身形肥胖，最「致命」係兒歌頒獎禮上，以「白雪公主」Look獻吻吳卓羲，被嘲為「死亡之吻」，畀網民笑足N年，唔抑鬱就假！難得欣宜憑自身努力鍛煉歌藝，多年後終於獲得認同，所以啫，真Fans無非想見到佢開開心心，祝欣宜早日康復啦！

娛樂