周吉佩同老婆無意再添丁 住所擬放租畀張與辰：間屋幾旺

周吉佩（吉吉）推出新歌《GUTS》MV，獲粉絲「吉S粉」在尖沙咀大搞應援展力撐，他指太太也到場幫手打點，自己也在推出應援T恤上給意見，務求增添時尚感，避免加入自己名字變歌迷會衫。

吉吉帶來MV中的嬰兒公仔，作為展覽一部分，他笑言抱起BB公仔過足手癮，也懷念昔日湊B日子，現在囡囡和兒子分別10歲和7歲，但太太無意再懷孕，他說：「太太佗兩胎都嘔得犀利，又擔心身材走樣，所以冇計劃再生，我本來只想生一個，聽到太太想要2個，我哋就生咗2個，𠵱家仲要栽培佢哋，都唔簡單。」

有報道指《中年好聲音3》亞軍張與辰現時租住的舊樓，曾發生過凶案，吉吉表示早前跟張與辰都有傾住屋問題，笑言有機會做張與辰包租公，吉吉說：「我今年有計劃搬屋，為方便小朋友返學，研究緊住所放租畀張與辰，我覺得間屋幾旺，又夠地方畀佢放靚衫，好適合佢，大家一齊旺，對方都話有興趣，仲話自己好乾淨，會好愛惜傢俬，所以我會保留呢個客，遲啲帶佢嚟我屋企打邊爐兼睇屋。」

（即時娛樂）