網上熱話｜盤點8大老細賤格行為 卸膊領功未算最癲！
打工仔最緊張的除咗份糧外，工作環境都十分重要，除了要有一班好同事，至關重要的絕對是上司與老細的工作能力及性格，萬一遇著一個好叻卸膊的老細的話，做細嘅真係有排煩！近日，有網民就在討論區盤點曾遇到過的8大老細賤格行為，未知你又有無共鳴呢？
1.亂咁炒人
一眾員工絕對是公司重要資產之一，若然老細對下屬的能力不了解的話，有機會直接影響公司運作。因此，有網民就表示曾經遇過「炒晒自己覺得冇用/嘥錢既人」，惟隔一排之後發現「搞唔掂」、「之後又請返」。
2. 輸打贏要
除咗搵另一半要有膊頭，有一個有膊頭的上司亦是一件十分珍貴的事，只因有人苦呻自己的老細「開會要向大老板匯報，功勞就佢攞，鑊就即刻射落嚟班細到」。
3. 扮工
相信不少打工仔多多少少都會扮下工，但若然睇到上司射晒啲嘢俾其他人做，而自己就攞住高人工un un腳的話，的確會唔多順眼。有網民就表示公司老細「成X日拎公費出trip，食個早餐po下social media就當自己做咗好多嘢咁」。
4. 訓導主任
小朋友就話驚俾家長監控上網，但估唔到返工都有老細長期mon住。有網民直言公司上司「Check 住上咩網，見一個 Block 一個，玩到最後連Google 都上唔到」、「但我做採購要上網搵資料，扮哂公道咁先開返比我，明明有 wifi 又唔比同事用」。
5. 毫無人情味
臨掛風球時早啲放員工走，以及大時大節提早收工是不少公司享有的福利，但若然遇著毫無人情味的老細，就有機會與網民一樣「8號風球唔掛正都唔比走」、「乜野年三十晚、中秋、冬至、從來都無放早」，更離譜到「我老豆出殯果日佢話有同事請左假去旅行叫我唔好放假，因為啲嘢無人識做」。
6. 卸膊
相信卸膊是職場上最常見的賤格行為，有網民分享老細「自己整唔見左份文件想入我數，後尾唔知邊個係文件櫃角落搵得返」、「隔離team老細經過指住份件：最後唔係你簽名咩？ 然後就走左，先還我一個清白」。
7. 扣人工當食生菜
打工仔返工都係為錢，但部分老細就好鍾意用扣人工去威脅員工，例如「遲到逐分鐘扣人工」、「補一日人工/扣一日人工計法係=月薪除當月工作日數」、「請no pay 要扣錢時，紅日星期日唔計工作日，OT要補錢時，紅日星期日就變咗係工作日」，導致往往「扣既錢永遠多過補既錢」。
8. 衛生堪憂
除了工作相關因素外，有時同事太唔講究衛生都好難頂。有網民就分享自己曾遇過一任老細，「去完廁所開大唔洗手唔沖廁走左去」，衛生情況堪憂。
睇完新聞，記得追蹤am730以下平台，接收最新、最啱你嘅消息！
Facebook：am730 (https://www.facebook.com/am730hk)
Instagram：am730hk (https://www.instagram.com/am730hk/)
YouTube：am730 (https://www.youtube.com/c/am730video)