何雁詩曾捲小三風波 被指搶人老公 感到痛苦：我有罪 剖白難處一度要靠父母幫

何雁詩 Stephanie與鄭俊弘Fred結婚一年，經常在社交平台分享新婚生活，大曬幸福。近日他們在美國補度蜜月，返港後又在月初趁結婚一周年補擺39圍喜酒。其實拍拖初期，二人曾鬧出「小三風波」，何雁詩被指介入鄭俊弘與當時未婚妻嘅感情，「搶人老公」，而鄭俊弘又被指背住拍拖三年多的未婚妻Beebs偷食，被封「賤男」。何雁詩於今年7月離巢TVB，近日她接受網上平台訪問，剖白當年難處，表示內疚與痛苦，直認：「我唔係人，我有罪。」

何雁詩與鄭俊弘因小三風波影響事業

何雁詩接受主持陳志雲訪問，於陳志雲個人頻道節目《Stephen．傾》道出當年被指是小三的事件。她透露當年和鄭俊弘原本是認識了幾年的朋友，她說：「佢係鬼佬性格，我就係半個鬼妹仔，大家都幾啱傾。」去到大家一起進入星夢唱片，溝通增加，經常見面，發現大家好有默契：「我有問佢其實我哋依家嘅關係係點，有一下大家覺得不如試吓一齊。」

17年，二人拍拖的消息傳開後，新聞開始鋪天蓋地報導，鄭俊弘被爆出有個圈外未婚妻Beebs，何雁詩直言大感驚訝，對她做成一個衝擊：「我依家都唔記得，究竟當時係咪未婚妻？」她表示當時二人事業上面對很大危機，同樣因為此事付出了很大代價，事後亦花了很多時間處理問題。

何雁詩澄清不知情 但也覺得自己有罪

何雁詩直言自己不太想重提此事，亦不想說鄭俊弘壞話：「咁多年嚟我都唔係好鍾意講，因為我覺得我講緊老公壞話，我唔覺得我應該喺任何人面前去講我另一半嘅壞話。」但她回想當日心情，指自己從來不是一個為了自己開心而踐踏別人心情的人，所以知道此事後都很不開心：「我係有唔開心，同有內疚，我令到另一方（鄭俊弘未婚妻）唔開心，雖然當時我唔知。」

她強調只代表自己發言，並不代表鄭俊弘。她指經過小三風波，自己也很難受，同時學到很多：「事情發生之後，我都有諗返，我有罪，我唔覺得我一個人係…我唔應該咁樣，所以我唔開心。我覺得當時我言行舉止都有啲問題，太直，有時講嘢唔經大腦。我嗰陣有講：『我清者自清』，咁我係唔知㗎嘛大佬，咁當然企喺觀眾立場係：『你都唔係清者』，我都好理解大家嘅心情。可能個天注定要我經歷呢啲嘢，去令我個人上返啱嘅軌道。」

何雁詩剖白二人難處要靠父母

何雁詩指爸爸、媽媽沒有給她意見，但很心痛，有在旁給予支持。有段時間，她與鄭俊弘出入不太方便，為了避開記者，她借了好朋友爸爸的貨車，躲在尾座出入，靠父母幫手駕車出入、買外賣。她未有覺得委屈，反而怕出街被人鬧，幸好一次都未試過：「網上面當然好多…唔開心，匿埋。」

何雁詩成功走出陰霾

何雁詩事後去到美國上堂、學樂器，利用休息時間建立價值，是她走出陰霾的第一步：「嗰段時間係我最搵返自己，做啲我好想做嘅嘢。」她事後有檢討自己，指若不是當年小三風波，就沒有現在的自己，頭腦不會這樣清醒。她認為當年的事令她變得更加堅強。至於跟鄭俊弘的關係，她指那件事令二人經歷同一樣危機，關係更好：「當然外間壓力好大，我哋當初好多負能量，後來大家支持大家。」

她坦承初時曾有一刻埋怨過對方隱瞞有未婚妻的事：「但我諗既然我揀得同呢個人一齊，如果怨佢，一係離開，如果要同佢一齊，我就要忘記佢。拍拖就唔好投訴人，過咗去嘅嘢，佢控制唔到，我又控制唔到。無得怨，已經發生咗。」她又指對方想很多，是個很少表達內心想法的人，所以她都曾努力鼓勵他多點溝通，將問題拿出來，大家一起解決，後來他慢慢改善。她大讚鄭俊弘能給她安全感：「佢係宅男，小朋友過我，我出街多過佢。」她亦不擔心對方將來會做錯事，因為最壞的都經歷過了：「唔相信有啲咩我哋經歷唔到！」

最愛鄭俊弘靚仔 默認曾與謝東閔拍拖

另外佢又首次承認曾經同謝東閔拍拖，又笑言對方靚仔，依家二人係好好朋友：「佢Ok嘅，佢係一個好好嘅男仔。」

被問到最愛鄭俊弘甚麼地方？何雁詩直言喜歡他「靚仔！哈哈哈！」陳志雲就指她曾與謝東閔拍拖，何雁詩尷尬地傻笑：「呃…我從來無喺鏡頭前承認過！」陳志雲繼續問，謝東閔是否靚仔，她笑言靚仔，又迴避問題：「唔知呢」，並無否認曾與謝東閔拍過拖。她又指大家現在是好朋友，並以一句話結尾說：「佢係一個好好嘅男仔嚟。」