PUMA Velocity NITRO 4 最親民嘅Daily Trainer

嚟到賽季，最紅嘅當然係一眾比賽鞋。不過一對稱職嘅 daily trainer 同樣重要，否則如何喺日常嘅 zone 2 練習儲里數？總唔會着比賽鞋做 easy run 吧？既屈就對鞋，況且比賽鞋多數定價高但唔耐磨，吓吓用佢傷腳又傷荷包。

今年夏天上架嘅 PUMA Velocity NITRO 4 「講鞋實測 」至今跑咗 84km，既然品牌定位為 daily trainer（中底前掌厚 26mm、後掌 36mm、高低差 10mm，而重量為 250g），我哋都跑咗 10km 或以內嘅 easy run 與 recovery run，以至跑班中嘅 tempo run，甚至短至100m sprint、長至 19km LSD ，〈講鞋〉覺得新 Velocity 比上一代更舒服、更親民，用途亦相當廣泛，忠實履行 daily trainer 嘅職責，不過亦有其局限性。

今代 Velocity 由外觀到功能設計都係 100% 推倒重來，最關鍵係中底由之前嘅雙層組合（上層 NITRO foam、下層 EVA），變成 100% 全 NITRO，而且配方上再有調整，故此完全被柔軟度籠罩☁️緩震與回彈都極為明顯，唔似上一代因為 EVA 關係總係覺得有啲硬。呢種改變，唔只適合 easy run 與 recovery run 等慢 pacing 練習，甚至做中等強度嘅 tempo 課都應付得到。

另一方面，Velocity 嘅中底內不設任何板塊，而且冇盲目跟風標榜 rocker effect，鞋頭鞋尾嘅翹起角度都好傳統、適可而止，所以唔會有強烈嘅前推感覺，新手都可以好易適應，況且喺冇外掛嘅情況下踏實練習，幫對腳打好個底，對新手而言比起甚麼黑魔法更為實際 !

外底方面，PUMAGRIP 喺抓地與耐用兩方面都難以挑剔，無講喺運動場或跑馬地，都未曾出現跣腳嘅迹象，甚至雨後嘅濕地都毫無問題，只要唔介意事後洗鞋，我都會推薦做水戰鞋。

而且喺 84km 過後，外底嘅磨蝕度仲係微乎其微，喺今時今日嘅跑鞋界嚟講，絕對係良心設計。鞋身方面，唔只鞋領、鞋舌有相當厚度，整個鞋楦都有別於纖薄化潮流，所以整個鞋櫳都好貼腳，亦頗有支撐力，但透氣度只屬一般，同暑假時相比，依家着 Velocity 4 會寫意好多。

亦都可能與鞋身用料加厚有關，今代 Velocity 我要着大半號（US 7.5 ➡️ 8），有意入手嘅跑友最好到門市試清楚，尤其是腳背偏厚嘅朋友，因為今代 Velocity 係相當貼背！

總括嚟講，只要啱 size，又唔喺夏天着用嘅話，Velocity 4 係一對好舒服嘅 daily trainer。而且親民度高，新手都可放膽試，甚至 1-2km 就完成磨合。由於緩震與回彈都同步提升，品牌仲話比上一代輕咗 14g，我會認為 easy、recovery、tempo 等 daily trainer 範圍內嘅用途都應付得到。

不過 interval 與長課就唔建議，原因之一係中底偏腍，加上冇內藏板塊，亦冇 rocker effect，interval 需要嘅爆發力非其專長；另一方面，同樣出於中底偏腍所至，去到長課後段會感到用多咗力去蹬腿，個人認為將距離限制喺 15km 內，人與鞋都會較易保持狀態。

最後少少補充，中底外側嘅坑紋設計，相信單純出於造型需要，功能上冇乜實質作用，但與多數同級對手嘅平滑造型相比，有助塑造獨特性，令跑友更易認，而 PUMA 近幾年喺 running 嘅付出與進步，相信大家都有目共睹。

Please follow Insports Hub on Facebook & Instagram
https://insportslab.com/
FB
https://www.facebook.com/insportslab
IG
https://www.instagram.com/insportslab/