姜濤新歌MV錫嘴破紀錄　林思廷床戲再續情緣

久未有新曲的姜濤終於出新歌〈岩巉〉，MV昨日上架，已有超過17萬觀看次數。而今次MV女角是林思廷，當中二人更有錫嘴及床上戲份，而且比《我的天堂城市》錫得更長時間。

新歌〈岩巉〉林家謙作曲，但原來已是差不多兩年前的作品，歌詞由Wyman負責，分享誠心等待真命天子來臨的愛情態度。姜濤分享歌曲誕生過程：「大概年幾兩年前聽到林家謙老師呢個曲，一聽就被intro琴聲吸引咗，即刻好想搵Wyman老師填呢隻歌，由佢嘅角度觀察我去寫呢隻歌，所以好Surprise佢用『岩巉』呢個廣東話獨有嘅詞彙，亦好好奇點解佢會咁樣寫我。我有問過Wyman老師，佢覺得我對愛情係一個好有耐性嘅人，唔會急於輕易搵另一半，用『岩巉』唔係因為我哋好奄尖，而係我哋真係好誠心去等待完全適合我哋嘅另一半。」

而今次〈岩巉〉MV，其實是〈愛情簽證申請〉的延續，姜濤再次做回自己，飾演備受注目藝人，姜濤將自己的想法加入其中：「MV係同導演一齊構思，做返喺平行時空裡面嘅姜濤，如果佢真係拍拖會點做呢？當我遇到一個真係好啱嘅人，我會奮不顧身去保護佢，同埋會向大家宣佈我好鍾意呢個人。咁啱〈愛情簽證申請〉MV最尾寫住To Be Continued，仲有個續集未拍，好想自己作品有個完整性，不如今次完成埋佢，當係另一種平衡時空嘅延續。兩個MV入面有好多小細節係可以對得上，希望大家可以發掘到呢啲彩蛋。」

林思廷Tammy擔任女主角，姜濤跟對方因為〈超感應學園〉而成為好友，姜濤說：「我哋呢個Project都好趕，要喺好短嘅時間Confirm好多嘢，但Confirm咗係Tammy之後，就慳返好多功夫，實在好多謝佢嘅幫忙。我每次去台灣都會同〈超感應學園〉呢班Friend見面，一直都有保持聯絡，所以同Tammy冇話生疏咗，所以拍攝過程都好順利，又好開心。」

至於是否勇敢去愛，姜濤回應：「我而家冇話想拍拖住，唔夠膽諗太多嘢，因為自己本身已經有太多事情要處理，所以如果再加多一份愛情喺度，未必處理得到。如果遇到一個啱嘅人，我又唔會完全放棄愛情呢件事，但暫時係事業為先。」