娛圈單打︱食物敏感非講玩　純情港姐執身彩

郭柏妍經常派糧。（右下圖：中咗「面目全非腳」嘅後果……）

哎唷，心痛死粉絲咯！以「純純兔」形象走紅嘅港姐兼小花郭柏妍，一向係大眼妹一名，明眸非常精靈，點不知食錯嘢，竟然搞到突發性敏感，塊面腫過豬頭！原本水汪汪嘅大眼睛得番一條線，仲呼吸困難視線模糊，嚇到伊人漏夜趕往醫院診治！

嘩，睇佢幾張自拍相，好似中咗「面目全非腳」咁款，真係我見猶憐。Rosita自爆食咗某啲食物後，短短半小時塊面即刻腫晒，初時以為食物中毒，經醫生診治，先知道係食物敏感！打咗針、食咗藥已有好轉，粉絲終於可以放下心頭大石。

大家都知，食物敏感唔係講玩，輕則腫口腫面皮膚發癢，重則呼吸困難甚至死亡！冇誇張㗎，外國不時有新聞，有人食咗一粒花生之嘛，最終命都冇埋，就知呢味嘢可大可小！好彩Rosita夠晒醒目，識得即時求醫咋！

好啦，小病是福，在此祝福Rosita早日康復。講起呢位清新脫俗嘅「純純兔」，早前喺《奪命提示》有亮眼表現，同劉穎鏇組成嘅孖妹性感警花令人一見難忘。翻查資料，Rosita仲有3套已拍竣嘅劇集在手，包括重頭劇《金式森林》；拍攝中嘅有《俠醫》，《新聞女王2》亦有佢一份，擺明備受力捧。

之不過，市場上年輕貌美嘅囡囡實在太多，單係《金式森林》，已有同為港姐出身嘅陳曉華、何依婷、莊子璇參演，Rosita面對嘅競爭愈來愈大，獨沽一味賣清純並唔係辦法。作為美貌與智慧並重嘅港姐，Rosita深明觀眾想要啲乜，不時喺社交網晒出露線頭唯美照，天使面孔，誘人身材，鹹濕仔梗係睇到笑呵呵啦！

娛樂