FI專欄｜用經濟學分析現實是否好人容易被欺負?｜阿蛋

古語有云: 人善被人欺 馬善被人騎。又有一位名人講過: 人善天不欺 簡單一個道理 ，究竟人善係咪真係容易被人欺呢? 我嘗試用經濟學去分析一下。

「呢個世界無免費午餐」係經濟學一個金科玉律，呢句說話唔係講緊午餐價格，而係講緊所有野都係有機會成本，亦即係代價。

我而家寫緊呢篇文章，我既機會成本(代價)可能係睇一套電影，亦可能係睇一本小說。接下黎我就會用呢一條經濟學金科玉律黎分析下好人係咪真係容易被欺負或者利用。

首先我地嘗試下由工作層面黎分析一下。好人係工作上較常遇到既場面其中一個可能係有另一位同事拜託佢做某件事。

例如好人小明被同事大文拜託幫佢做好一份市場分析報告，因為大文佢手頭上有另一個好緊急既項目實在無時間，善良又易話為既小明出於為善最樂既理念，就幫左大文今次既忙。點知慢慢大文變本加厲，令到小明額外多左好多工作，要不斷加班先勉強趕上進度! 小明曾經嘗試拒絕，但面對大文軟硬兼施地懇求，小明都係狠唔下心，結果自己既時間就無晒，而佢同大文既感情亦唔覺得有咩改進。

我地可以由大文既角度分析一下。佢想嘗試將佢手頭上既項目卸俾人，假設有兩個同事，一個係好好人不想拒絕人既小明，另一個係成日大大聲鬧人既阿強，大文理所當然會問小明先! 因為問小明既代價可能只係一聲輕輕拒絕，而問阿強既代價可能係會俾佢大聲斥責，什至夾雜粗言衊語!所以點解一個斯文不懂拒絕好似小明既人會容易吸引大文呢一種人? 係因為利用小明既機會成本實在太低! 對大文黎講，完成手上既一份報告只需用口問一條問題，代價何其低!

咁係咪我鼓勵大家都成為阿強?要聲大夾惡!非也非也。首先小明要幫人絕對唔係問題，因為呢個係個人理念問題，但係幫人之餘，都要對方付出返相應既代價，如請食返一餐omakase，如果大文之後撒賴，咁就清楚知道大文原來只係一個搵人著數既無賴，亦都可以以餐飯未請為由，唔再幫助佢。

當然要增加對方既機會成本仲有好多方法。例如大文聲淚俱下咁求小明，小明一時心軟又接受左，之後好後悔，可以將份報告亂做一通，等大文付出代價，就係報告既質素，到時大文發覺每次熱心既小明都會做出一份不堪入目既報告，佢自己唔想承受低質素報告帶黎既負面效應，就自然唔會再搵小明。

歸根究底，好人易被利用既原因係因為對方要付出既機會成本實在太低，唔想被利用，唔係要做壞人，但一定提高返對方既機會成本。一段平等利益既關係，其實好多時比一段無利益純情感既關係健康。

Subscribe FORTUNE INSIGHT Telegram:
http://bit.ly/2M63TRO

Subscribe FORTUNE INSIGHT YouTube channel:
http://bit.ly/2FgJTen