奇情谷｜吳若希心理測驗揭「屈從討好」性格 跟老公隔住熒幕耍花槍

由導演火火、吳若希（Jinny）及曾展望（GM）主持的TVB Plus節目《奇情谷》，昨晚（1日）一集主題為「心理學家解讀極端人格」，請來註冊臨床心理學家何欣容博士（Connie）。

她講解討好型人格（M底）及「最危險情人」的邊緣型人格障礙症（BPD），又為3位谷主「基模測驗」，分析他們所屬人格中的缺失。Connie解釋何謂「M底」時說︰「日常生活例子，就好似你叫咗杯凍檸茶，嚟咗杯凍檸水喎，有討好型人格就覺得唔緊要，都係『檸』啫，飲咗佢算啦。想Please全世界嘅人，好驚人唔鍾意佢，好多嘢都屈就咗。」

Jinny在測試中是唯一具備「屈從討好」性格，跟她表現出的強悍作風大不同，她語帶震驚說︰「即係我某程度係『M底』？令我好surprise，我成日以為係『S底』。」火火笑言千萬不要讓Jinny老公知道。

到遊戲環節，火火讀出當晚問題「認為點為之絕世大渣男？」，並提供4個選擇答案︰A.色情狂、B.軟飯王 C.花心怪 D.大話精，作答的吳若希（Jinny）竟毫不猶疑講出答案︰「我最憎最憎最憎啲人講大話。」火火亦被Jinny的直白嚇親，帶點無奈說︰「呢個貼士真係好明顯喎，明顯到咁得唔得㗎？唔知仲有無人估錯，次次講到好明顯都有人估錯。」Jinny此舉疑似隔住熒幕跟老公耍花槍。

基模測試中三位谷主共同擁有「永不能達到的標準」、「無法信任」的共通點，Connie解釋可能跟演藝行業有關，Jinny也認同︰「我哋嘅行業無標準，唔係一加一等於二。」火火亦表贊同︰「演戲、表演就算你有1萬個人話你好，都可能有2千個覺得你唔好，攞最佳男主角都唔代表啲人認同你。」至於「無法信任」是覺得身邊人講一套、做一套，表面稱讚但背地裏是另一番嘴臉。

（即時娛樂）