鄭伊健北美巡演圓滿結束　Feanna獻唱《戀愛預告》獲原唱指導

自從2022年尾歌手鄭伊健在紅館完成9場《HERE & NOW EKIN IN CONCERT 鄭伊健演唱會》後，過去3年先後到三藩市、洛杉磯、倫敦、吉隆坡、高雄及澳門等地舉行巡唱，上月底再舉行了3場北美洲巡唱，此行伊健更帶同小師妹黃淑蔓(Feanna)一起出發。

今次是伊健入行40年以來，首次在多倫多開演唱會，他特別準備兩套新衫見歌迷，出發前更加操排舞和練歌，當日演唱會氣氛高漲，歌迷跟他一齊跳舞，伊健準備了演唱會版紀念Tee作為「手信」，在Encore環節獻唱《自動勝利Let's Fight》時，與Dancers一起將Tee拋下台送給觀眾，掀起高潮。Feanna三站都獻唱《戀愛預告》，她說：「伊健哥哥想我唱啲開心嘅歌，突然諗到林珊珊嘅《戀愛預告》，其實珊珊係我經理人，雖然佢提點咗我好多唱呢首歌嘅演繹技巧，但始終珊珊係原唱，加上佢都有一齊嚟今次巡迴，所以我唱嘅時候係好大壓力，好在有現場觀眾嘅掌聲同歡呼聲鼓勵，畀咗好多信心我。」

完成首站多倫多後，伊健給Feanna和工作人員送上窩心驚喜，出資安排他們遊覽景點尼亞加拉大瀑布，Feanna冒住全身濕透登上遊船，近距離感受大瀑布的氣勢，她笑說：「可以上船近距離睇大瀑布，感受啲瀑布水飛埋身，雖然玩到妝都溶晒，但大家都玩得好開心。Feanna又表示跟團隊遊歷了不少地方，笑言希望可以跟伊健到日本或韓國繼續唱，「咁我就可以留多幾日…哈哈！真係一個諗法唔好嘅少女呀！」美加3場演唱會終於圓滿成功，伊健表示無忘3年前疫情期間開騷的初衷：「做騷梗係開心啦，大家最緊要開心！」

另外，大隊再到大西洋城及雷諾進行巡唱期間，發生小插曲，因為中間要接駁兩程內陸機，由於第一班機延遲，只剩兩分鐘時間轉機，極速跑去另一個閘口登機，幸好能趕得及上機，Feanna說：「最擔心係啲行李跟唔切飛機，大家都作出最壞打算，以為連衫都冇得換，點知我哋去到雷諾，居然見到我哋啲行李，嗰種失而復得嘅心情，真係好難形容，所以今次呢個旅程，真係有好多難忘同開心嘅回憶。」

東網網站 : https://on.cc/東網Facebook專頁 : https://www.facebook.com/onccnews/