娛圈單打︱趷起條尾知想點　最後贏家好有面

74歲嘅「癡心情長劍」李龍基，盼星星盼月亮，終於盼到37歲嘅未婚妻王青霞出獄啦！女方因為逾期居留、使用虛假文書等5宗罪，被判入獄25個月，基哥日日探監風雨不改，多次公開灑下男兒淚。皇天不負有心人，未婚妻數日前終於出獄，冇穿冇爛、小鳥依人般企喺基哥身旁，好一幅父慈女孝──吖唔係──係好一幅情深義重嘅畫面，令人感動啊！

雖然王青霞被遞解出境，要返番內地，但基哥唔嫌山長水遠，手持大束玫瑰，喺深圳灣口岸癡心守候。甫見到未婚妻出現啫，即情不自禁大叫「老婆」，煙韌程度絕對不比後生仔女遜色！基哥話喎，要同「老婆」擦餐勁嘅，抖幾日再一齊返佛山，親自向女方父母提親，好快就會拉埋天窗嘞！

好咯，基哥終於等到呢一日！大家都知，佢「老婆」是如何起高樓，又是如何樓塌了，所謂才女人設，全屬虛假，仲被指蓄意拖延婚事，搞到基哥人財兩失咁滯！之不過人老精、鬼老靈，基哥食鹽多過你食米，乜嘢蠱惑嘢未見過吖，正是趷起條尾都知你想點！果不其然，王青霞忽然被人舉報，失去了所有，淪為階下囚，都咪話唔令人震驚！

基哥由最初疑似慘遭欺騙、受人憐憫嘅老頭，搖身成為最後贏家，呢個Big Boss認真唔簡單！家陣女方冇錢冇物，偏偏又歎慣食慣，想起飛腳真係咪使旨意。難怪網民紛紛大讚基哥識得玩，薑係老的辣！

話就話上得山多終遇虎啫，但若然冇人篤灰，執法部門未必掌握到咁多證據。喂，咁究竟金手指係邊個啫？正所謂以結果為目標，邊個係最後贏家，邊個咪嫌疑最大囉！

東網網站 : https://on.cc/東網Facebook專頁 : https://www.facebook.com/onccnews/