天水圍躁男疑虐嬰 輕鐵內大力打嬰兒腿部 目擊者：起碼廿幾次！
昨日(2日)晚上網上流傳一段僅幾秒長的影片顯示，一名推BB車的男子，在輕鐵列車內用力打嬰兒的腳部，片中可聽到響亮的「啪」一聲。拍攝片段的目擊者指，曾聽到片中男子向BB講：「你伸隻腳上嚟啊！我打到你唔識伸上嚟！」目擊者直言睇到「心痛」，隨後男子推著BB車在天瑞落車。影片引發網民怒火，齊聲促報警拉人。
目擊事件的拍片者在社交平台Threads分享影片表示：「希望可以forward到俾bb個媽媽睇」，拍片者指：「呢個唔知係你老公你呀哥細佬定係咩都好，bb隻腳只係放咗上嚟佢就即刻打落去，仲要係唔止一次半次，係起碼廿幾次，而且每次都超大力咁打落去，打到啪啪聲，臨落車嘅時候佢仲要用個電話好用力咁打落bb隻腳度，真係見到好X心痛」。
網民：已經報咗警警方話需要更多資料
拍片者描述，嬰兒在被拍打時僅「輕輕喊咗2聲」，「呢次真係我人生咁想一個bb喊得超大聲」，她形容對方「真係似有一個痴線佬」，奈何她無勇氣當面制止，亦為此自責：「bb我對你唔住，係姐姐冇勇氣救你。」拍片者再向網民留言：「我唔係要like呀，我要你哋forward出去」。
帖文曝光後，隨即引起網民公憤。不少人強烈譴責暴力行為「報警啊虐兒啊」、「黐線，要報警！個BB可能個6月大都冇」、「唔好等fw，分分鐘佢老母係同謀，想救B就即刻去報警」、「樓主會唔會online報個案先？你有時間地點嘅資料，希望多個機會幫到bb」，亦有網民表示：「hello，我已經報咗警，請check dm，因為見到好心痛，而警方話需要你更多資料先做到野」。
睇完新聞，記得追蹤am730以下平台，接收最新、最啱你嘅消息！
Facebook：am730 (https://www.facebook.com/am730hk)
Instagram：am730hk (https://www.instagram.com/am730hk/)
YouTube：am730 (https://www.youtube.com/c/am730video)