Ray Online｜議員參觀機電署竟困𨋢20分鐘　署長笑言會請議員吃飯補償

一班立法會議員噚日參觀機電工程署總部，了解署方嘅創新同科技項目。點知一班議員喺總部困𨋢20分鐘，睇嚟有啲諷刺呀。

立法會發展智慧城市事宜小組委員會幾個議員有份參觀，當機電署署長潘國英帶隊喺地下搭𨋢上樓參觀嗰陣，一班人就遇到困𨋢意外。好彩𨋢入面嘅燈同風扇正常運作，期間一班人傾偈打發時間。等咗大約20分鐘，技術人員到場協助，將升降機升上最頂層，一班人先可以解困。

有「幸運兒」避開意外

有「受害者」笑言意外係「打咗機電署一巴」 ，又話因為意外耽誤咗食飯時間，署長喺困𨋢期間都話會請議員食飯補償。有議員亦話機電署負責規管升降機同自動電梯安全，點知喺自己地方就發生升降機故障，仲要喺外人參觀嗰陣發生意外，認真失威呀。有個議員成為「幸運兒」，佢就係民建聯嘅梁熙，因為佢冇跟大隊由立法會出車去機電署總部，而避過呢場意外。

署長之後向議員解釋，應該係因為升降機門感應器，感應到門未完全閉合，而造成意外。而機電工程署回覆傳媒查詢話，總部其中一部升降機喺噚日朝早發生輕微故障，註冊升降機承辦商派員到場檢查，確保安全同運作正常之後，已經重置升降機，全部乘客安全離開。

原文刊登於 AM730

睇完新聞，記得追蹤am730以下平台，接收最新、最啱你嘅消息！
Facebook：am730 (https://www.facebook.com/am730hk)
Instagram：am730hk (https://www.instagram.com/am730hk/)
YouTube：am730 (https://www.youtube.com/c/am730video)