王浩信一提陳自瑤着泳裝即落閂：講住咁多先

藝人王浩信及湯怡下午代表主演新劇《反黑路人甲》（前名《極道怪咖》）出席無綫「TVB Amazing Summer」記者會。談到今次於劇內有感情線，二人坦言合作愉快，監製林志華已表明想「再下一城」，湯怡自言拍電視劇拍出癮來。

談到拍攝時難忘事，湯怡表示：「又場戲講我喺廿幾樓被吊，劇本起初係話十幾樓，去到發現一個Double，嚇到我喊咗出嚟。」王浩信聞言補充：「佢好想親身試演，但係邊行邊喊囉，劇情交代我去救佢。今次我角色比較草根，自己首次暑假有劇出，希望一家大細追睇。」他又指自己會翻唱鄭伊健名曲《甘心替代你》作劇集歌曲。

至於太太陳自瑤於《那些我愛過的人》以泳衣Look登場，被網民讚索爆，王浩信表示：「咁佢不嬲都索嘅。（拍之前你知？）係。（介意嗎？）講住咁多先啦。」父親節即將到臨，王浩信表示日日都要開工：「如果抽倒時間陪屋企人已經係慶祝喇。」

東網網站 : https://on.cc/

東網Facebook專頁 : https://www.facebook.com/onccnews/