Fairy Tale學心理：灰姑娘教曉我們的是…… (上)

灰姑娘嘅故仔大家匿埋眼都識背啦！

故仔講述一個命運悲慘嘅靚女，俾心腸歹毒嘅繼母/繼姐蝦，幾經辛苦，終於捱出頭來，從芸芸靚女中得到王子嘅青睞，成為王妃，從此過住幸福快樂嘅生活……

你以為故仔真係咁簡單？灰姑娘真係憑住一顆真誠善良嘅心跑出？天下女子何其多？少年人，你真係太年輕喇！

對於人同人之間嘅愛，美國心理學權威Prof. Robert Sternberg早喺1980年代提出咗黃金三角理論。

佢話愛有三大元素：激情 (passion)、親密(intimacy) 同承諾 (commitment)。激情係愛嘅原動力，會激發一啲浪漫窩心嘅舉動、增加吸引力嘅行為，同埋性衝動；親密係兩個人交流連繫嘅感覺，令我哋心頭泛起陣陣暖意；承諾就係長遠維持關係嘅決定，姐係兩個人決定朝住共同嘅目標一齊努力生活。

嗱，所謂嘅愛，原理就同煲熱水差唔多。

首先我哋要撻著個火，幫啲水加溫；到啲水煲滾，就要lock住個水壺保溫；保溫保到咁上下，啲水又會攤凍咗啲，咁又要著返個火再煲過。愛，就係一個keep住幫關係加溫保溫嘅過程囉。

雖然而家大家都鐘意用呢個黃金三角理論講愛情，但其實呢個理論係可以套用喺任何一段存在住「愛」嘅關係，包括父子/母女情、兄弟/姊妹情、師生/朋友情……呢個咪就係權威之所以係權威嘅精妙之處囉！

睇到呢度，大家對灰姑娘點樣俘虜王子個心又有啲咩諗法？下個post一齊再傾。

🔍 想知多啲，可以睇下呢篇文：
Sternberg, R. J. (1986). A triangular theory of love. Psychological review, 93(2), 119.

          View this post on Instagram                      

A post shared by 吾係心理學家 Hi Psychologist! (@hkhipsychologist)