謝寧選完港姐難抵壓力致抑鬱 嘆與岑建勳「父親式婚姻」

1985年香港小姐冠軍謝寧，日前到新城廣播接受李有毅（Ben）和兒子李國煒（Benson）主持的《Ben同Benson「chur」到行》訪問，謝寧當年參選香港小姐，Ben亦剛加入《香港早晨》擔任主持，並訪問過對方，謝寧笑言：「都成40年前，所以超過50歲嘅朋友先認得我。」

謝寧參選港姐前，曾在一間音樂學校教琴，當時她對人生感到迷茫，決定參選香港小姐，最後奪得冠軍。Ben憶述當晚問答環節，謝寧給出的答案令人印象深刻，Benson即場問多次當晚問題：「謝寧小姐，𠵱家有一個病叫做愛滋病，大家都知道係唔好嘅病，如果畀你一個機會，將愛滋病改一個名，你會改咩名呢？」謝寧回答：「我會改一個恐嚇性嘅名，叫game over，即係玩完喇，你唔驚呀？」後來外界對她的回答反應熱烈，令她始料不及。

謝寧亦爆料指大會事前曾給她們35條題目，所有女生便圍在一起想答案，她表示：「唔係我叻，只能夠講我好好運，揀咗條好有趣嘅問題，同埋好有趣嘅答案，但個答案係邊個改，我就唔知喇，因為係30幾個女仔一齊諗嘅。」

謝寧當選後人氣急升，但她當時心情低落：「我發覺我唔可以承受咁大壓力，我唔係幕前嘅人，身高又唔係高，啲人覺得我係香港小姐最矮一個，自己唔識得處理外間對我評價，我就好封閉自己，好唔開心，然後我覺得我係有抑鬱。」

謝寧續指：「我唔鍾意畀人指指點點，一夜之間每個人都識得自己，嗰種感覺好唔舒服，好似睇動物咁睇你，有啲人慌死人哋唔識你，會好享受，但我唔鍾意，我好怕人哋識得我，到𠵱家都有呢種感覺，可能個人自信心唔夠，所以嗰一年我覺得好慘。」

直至踏入人生第二個階段，Ben形容當時外界得知謝寧與岑建勳拍拖都大吃一驚，謝寧笑稱：「絕對係美女與野獸！」她透露2人拍拖是跟信仰有關，因自己期望要有一位基督徒男友和丈夫，於是帶對方返教會，「點知佢真係決志，咁我咪覺得係佢喇！」然而2人因性格不合，2005年結束結婚14年婚姻，「佢係一個好成熟、好老積嘅人，佢係一個大人，我係小朋友，我哋有好大段距離，我唔可以有一個父親式婚姻，好似我咩都要聽佢講，我冇自己諗法，我要生活喺佢陰影下，我冇咗自己；其實佢冇變，變嘅係我。」

離婚後，謝寧在教會遇上現任丈夫王德偉，她說：「當時我唔識佢，只係覺得佢好靚仔，有一次我同朋友講起呢件事，佢話同我一齊返教會，睇下撞唔撞到呢個人，點知一泊低架車，擰轉身就見到佢，我好無恥上去同佢講『我覺得你好熟面口，我唔想排隊，可唔可以打尖呀』，佢話隨便啦，跟住一齊排隊入教會。」

之後眾人互相介紹，原來男方是TVB的舊同事，更曾為謝寧拍照，謝寧表示：「然後我就諗點樣攞佢電話，咁啱就嚟中秋節，我要幫曲奇店影中秋節產品，我就搵佢做freelance，咁就交換咗電話；喺做嘢過程去了解呢個人，覺得佢好單純同溫柔，發覺佢好啱我，就開始拍拖，經歷十堂婚姻輔導就步入婚姻，好開心。」Ben看到謝寧春風滿臉的樣子笑言：「嘩，見到你雙眼閃閃發光，好甜蜜。」

（即時娛樂）