2025年的香港電影 意想不到咁差嘅一年？
香港電影經過大豐收嘅2024，當以為2025會穩步上揚時，點知迎嚟意想不到咁差嘅一年。一如既往，我會喺下面幫大家簡單總結今年嘅港產片，再分享下個人感受。
賀歲片
作為每年第一個大檔期，2025有三套港產片上映。佢地都係幾典型嘅賀歲片，宣傳海報用紅色底，有喜劇同新年元素，卡士強勁，不過劇情只係不過不失，甚至有啲老套。相比2024賀歲檔，三部電影風格各異，《盜月者》同《臨時劫案》更令人眼前一亮，今年嘅賀歲片的確相形見絀。
因此，對於賀歲片係咪過時嘅討論一下子變得熾熱，畢竟觀眾睇咗類似嘅題材咁多年，已經開始厭倦，甚至抗拒依種比較公式化嘅電影。未來賀歲片如果想取得成功，相信喺劇本上要再花啲心思。
雖然三套電影成績比去年遜色，但賀歲檔仍然有佢嘅基本盤，兩部票房成功過千萬，或者都間接證明賀歲片仲有佢嘅存在價值。
都市傳說
而2025最特別嘅現象，就係有唔少拍完一段時間嘅作品，喺千呼萬喚後陸續面世。隨便一數就有《風林火山》、《阿龍》、《送院途中》、《曾經擁有》、《金童》，連《再見UFO》喺年尾都有特別放映。
依啲電影之所以成為都市傳說，坦白講，確實有各自嘅問題。《風林火山》太貪心，世界觀過大，角色同整個城市嘅描寫都唔夠，令故事變得破碎；《送院途中》支線多又唔吸引，主線幾唔錯但就有點草草帶過；《阿龍》同《曾經擁有》就劇本比較薄弱。
雖然依啲電影有佢嘅不足，但亦紀錄咗唔少珍貴片段。《風林火山》見返當年嘅古天樂同金城武，咁大卡士同規模嘅製作實在可一不可再；《金童》比大家睇到練出一身肌肉嘅阿聰，仲有未長高嘅皓嵐；《曾經擁有》呈現七八年前香港嘅大街小巷，明明當年嘅回憶仲歷歷在目，但喺銀幕上睇，感覺變化已經好大。適逢當日喺快將結業嘅海運戲院欣賞，令嗰種事過境遷嘅感覺更加強烈。
另一套都市傳說《尋秦記》亦即將上映，作為影迷，樂見依啲電影終於可以比大眾看見。
票房慘淡
2024年香港電影票房成績彪炳，兩套過億作品，過千萬作品都有十幾套。勢估唔到2025成績一落千丈，過千萬嘅作品得七套(可能仲有壓哨衝線嘅《金童》)，仲要全部都係僅僅過，更無一部進佔到香港全年票房頭十名，亦好多年無試過連過二千萬票房嘅戲都無。特別疫情後港產片復興，對比之下今年實在太慘淡。
有啲作品明明產生咗唔少話題，好似《風林火山》同《世外》，但就未能完全反映喺票房上。而《殺手#4》題材特別，打得爽又刺激，但因為上映檔期令宣傳停滯，一個星期後場次已經大減，勉強先過到一百萬，非常可惜；《觸電》受限於題材，就算贏盡口碑，減埋票價，票房都只能稱得上不過不失。
過去幾年，偶像效應同大型合拍片都係票房其中一個來源，但依兩個因素喺今年幾近絕跡，同時要繼續面對串流平台同外地電影嘅挑戰。種種因素驅使下，令2025成為近幾十年港產片成績最差嘅其中一年。
仍有佳作
雖然2025香港電影市場低迷，慶幸仍然產出唔少佳作。
《香港四徑大步走》真實地紀錄依場熱血又辛酸嘅賽事，讓觀眾以另一個角度欣賞美麗嘅香港；《看我今天怎麼說》以第一身視角帶大家感受聾人嘅世界，情感真摯；《不赦之罪》將宗教信仰同至親受害嘅矛盾赤裸地呈現，觀影過程不斷引起觀眾思考，餘韻極強。
《觸電》結合電競同動作片，劇情緊湊，概念創新；《世外》製作出世界級動畫，每一幕都令人目不暇給；《金童》喺年尾無冷場地打出一場熱血拳賽，為大家打打氣。
依啲佳作成功喺今年港產片嘅暗淡中帶出一點光芒。
鏗鏘集式電影
近年一有涉足社會議題嘅電影出現，總會有聲音話又係鏗鏘集。今年可能因為港產片熱潮退卻，依種聲音再次變得普遍。無可否認，喺香港嘅環境同有限成本下，近年唔少電影係頗沉重同寫實，但當中不乏出色嘅作品，亦有唔少充滿戲劇性。其實社會議題本身就係一個好大嘅類別，以前港產片光輝年代同樣有唔少依類作品。
再者，近年社會議題以外嘅電影都產出唔少佳作，2024年就係最佳例子，唔同題材嘅電影都非常出色，做到百花齊放。就算嚟到今年，取材依然多元化，社會議題只係佔一小部分。希望未來大家會慢慢拋低港產片等於鏗鏘集嘅既定印象。
港產片已死？
依個命題隔一排就會被提起，特別見到今年嘅市道，難免令人灰心，外界對港產片嘅批評亦接踵而來。
我明白有人好唔鐘意所謂「情緒勒索」式嘅宣傳，近年亦有唔少令人失望嘅電影。不過，有唔少人未入場就一味批評，條尺亦放得高到誇張。批評港產片當然無問題，但希望大家睇到好嘅電影時，會用返同樣力度去讚賞，近年港產片嘅平均質素其實絕對唔差。
另一方面，2025能夠開到鏡香港電影並唔多，未來如何喺寒冬下逆境求存，係整個電影界都要面對嘅挑戰。
邊個理由夠厚，就可以企到最後！
就算作為死忠，亦不得不承認2025嘅港產片係無咁吸引，但我深信即使睇港產片潮流退卻，只要有好作品，觀眾依然會入場，我亦會繼續不離不棄地支持。上斜落斜都係斜路，有起有落其實正常不過，港產片唔會咁易死！
2025對香港人同港產片嚟講，都係唔容易嘅一年。太多事發生，太多情緒難以抒發。不過，無論時代再難，面對再多高山低谷，香港電影都會一直陪伴大家。
2026再接再厲！
▼Follow hkpopculturelover
Instagram: https://www.instagram.com/hkpopculturelover/