宏福苑火災一個月｜憶獨困火場九小時 獲救大學生獻花、捐款、練舞努力復常：唔會有人包容我哋咁耐
大埔宏福苑五級火，造成 161 死、79 傷。過去一個月，本來安居樂業的居民，變成流離失所的災民。最先起火的大廈，宏昌閣最少 70 人罹難。居於中層的大學生 Hayley向《集誌社》憶述，上月 26 日，孤身困於火場逾九小時的經過，是雙親在電話中盡力保持正面安撫，令她支持下去。事後她才知道，那一夜，在話筒另一端的媽媽，不時走到一旁哭泣。
從火場回到現實，她期盼真相早日水落石出。這一個月，她盡力「Back to normal」，明白生活仍要繼續。獲救後，她選擇重返現場獻花、捐款，只因她相信，「唔會有其他人可以包容我哋咁耐時間」。
「其實你到嗰一刻，係唔會好諗到點樣做。」
11 月 26 日下午 2 時 51 分，是消防處接到火警通報的時間，《集誌社》早前取得宏昌閣居民的閉路片段顯示，2 時 53 分，白煙已飄至走火樓梯。 3 時 02 分，首批消防員到場，同時將火警立即升至三級， 32 分鐘內，火警升為四級。
起火時，Hayley 正在房間開 Zoom Meeting。她接到一通電話，話筒裡，是居於宏健閣的姨媽告知，大廈正起火；而在此前，她說，已聞到大廈有燶味，「膠膠哋，唔會係煲燶咗，但你唔會 relate 到呢樣嘢」。
「出到去廳，大門已經有黑煙攻緊入嚟，由此推論，我就覺得走廊已經全部都係黑煙。」沒有冒險打開家門，當時獨自一人的 Hayley ，選擇衝進洗手間、沾濕面巾，返回房間，用被封住房門暫避。她說，小時候學過不同消防安全知識，但濃煙攻至的一刻，是混亂、惆悵、無法冷靜「其實你到嗰一刻，係唔會好諗到點樣做。」
Hayley 嘗試過打開房門尋找物資，但客廳已經滿佈黑煙。期間，她與家人保持電話聯絡，父母、親戚、男朋友都趕到現場，再三向消防確認，自己在單位內。
「如果我係隔離嗰座，我就一定玩完」
「我間房望向吐露港…但左邊望出去，係宏盛閣， 4、5 點時，嗰邊單位三十幾層，全部都係火，燒到無咗個外牆…佢就係一拃火，一條火柱，即係你吹一吹海風過嚟，或者焫着啲咩，如果我係隔離嗰座，我就一定玩完。」
無從得知情況，雙親卻不懈安撫她指火勢已受控。Hayley 憶述，父母盡力保持正面，事後她才得知，母親當日不時走到一旁哭泣。
朋友傳來火警升上五級的新聞，Hayley 說，自己也忍不住看討論區，始知道情況有多嚴重「每幢都燒成咁…我成世人都未聽過爆炸聲，原來呢件事係可以咁大鑊。」
在腦海中，Hayley 幻想過不同場景可以如何自救。「如果有火從我大門、客廳燒入嚟，我係咪應該要開窗搏一搏？…我已經諗過好多次…如果我真係要死喺度，我寧願係窒息死。」
晚上七時 父母致電指中、下層火勢受控
晚上七時許，父母隔著電話終於帶來好消息，指宏昌閣中、下層火勢已經受控。手握已經乾透的毛巾，Hayley 說，當時呼吸都有熾灼感的她，才稍稍安心，知道接下來要等待消防破門。
由被告知火勢受控，直至接近凌晨，期間消防再致電她，確認位置。Hayley 說，樓層上下傳出破門聲，直到聲音迫近至單位前。期間，消防員曾嘗試破門未果，經歷了 10 分鐘的煎熬，伴隨電鑽聲、氧氣罩，她認知到，自己獲救了。
「啲牆係燒到滿目瘡痍」
「行出去係覺得幾震撼，度門係爛晒，當然你係會 expect 所有嘢係爛晒…但你親眼望到屋企度門爛晒，而且出面啲牆係燒到滿目瘡痍嘅時候，係好震撼。」
大維修期間，宏福苑大廈走火梯被換上木製活門。Hayley 說，自己單位對出已是走火梯，但消防員卻選擇兜至另一條走火梯，她推測，可能當時樓梯已無法通過；至於她離開的走火梯，則滿溢著流水。
「地下仍然辣辣哋⋯⋯大堂應該燒到無咗」
行進間，Hayley 仍有觀察周圍。她說，單位沒被火勢波及，但下一刻步出，整個畫面「黑鼆鼆、溶溶爛爛」、地下仍然「辣辣哋」，包括最近電梯的兩個單位有火，消防員也叮囑她前面仍有火頭，「可能再遲啲，已經燒咗過嚟，我都無㗎啦。」
「行到最底，我係完全唔認得嗰度，好似從來無見過呢個地方，大堂應該係燒到無咗，所以我出到嚟先知，原來我已經出到嚟。」
Hayley 是 79 名送院傷者之一。登上擔架床開始，她看了一整晚新聞、看了網民自製的資訊平台。同層之中，有鄰居與兩隻寵物貓失救；另一棟宏泰閣，她說，母校一位老師的妻子失去聯絡，後來學校社交平台發代禱信，那個家庭一死、一傷。
「呢一場大火係攞咗好多好好嘅人嘅生命，呢啲嘢同我太近…上咗救護車已經開始睇緊新聞，我想知啲火係咪熄晒？」
選擇返現場獻花、捐款、繼續練舞
大火早已熄滅，但隨之而來，是災民需要重拾生活，以 Hayley 一家為例，在她入院期間，父母也要四出奔波申請援助。不過訪問當下，Hayley 的打扮與尋常大學生無異，手袋還掛上一隻 Chiikawa 公仔。
她形容，歷劫後，初期無由來地「覺得好攰、無動力」，「佢報出嚟 160 人（死亡數字最新為 161 人），係多過一個年級，呢個數字好驚人；同埋係160幾個家庭。」但很快地，她選擇返現場獻花，也捐款予仁濟醫院、紅十字會，以至殉職消防員何偉豪的家人。甚至在剛出院後，繼續練習中國舞，「我盡量做返我平時會做嘅嘢，平時上堂、幫人補習、跳舞。」
在宏福苑出生成長至今，Hayley 說：「我覺得成個屋苑位置，係個環境，全部都識行，唔使問就知邊到打邊度，我覺得好奇怪係，成個屋苑無咗。」
大火無情，時間亦然。三周後，輿論開始有反彈，批評災民受到太多援助，但仍然嫌東嫌西。Hayley 說，感恩社會各界幫助，但面對罵聲，她舉例，居於康城的人，也可呻十幾分鐘一班地鐵，反問為何災民不能呻？花一億公帑起涼亭、噴水裝設，又是否合理？
她說，現階段，希望政府可釐清居民意向、率先安置老幼，以及徹查事件，「要還畀佢哋公道、清白；我唔希望政府令到呢件事不了了之。」
至於重回生活，她說，「每個人都要生活、返工，唔會有其他人可以包容我哋咁耐時間，返工、返學唔可以 gap 一個月；都要用返平做開嘅嘢，強迫自己 back to normal。」
歡迎追蹤以下平台，即時接收《集誌社》最新資訊，及付費訂閱支持！
【付費訂閱《集誌社》】
https://thecollectivehk.com/subscribe/
【訂閱《集誌社》Youtube】
https://www.youtube.com/@thecollectivehk
【Like 《集誌社》IG】
https://www.instagram.com/the_collectivehk/