呂爵安呼籲支持賀歲片　避談會否和林明禎入場

藝人呂爵安（Edan)、金燕玲、鍾雪瑩、李尚正和小演員李鎧霖，今日為賀歲片《金多寶》出席團拜活動，現場與粉絲大玩遊戲。Edan主動跟粉絲自拍，盡顯親民一面。大會公布電影港澳累積票房688萬（截至今日下午1時），Edan表示多謝大家的支持，會叫身邊朋友睇戲支持，今晚Edan亦會謝票，趁新年準備送祝福給大家，他說新年謝票感覺很不一樣，因為見到好多人一家大細入場睇戲，與家人共渡美好時光。他明言若中了金多寶，會拿錢幫翁子光導演「填氹」，因為導演當初借錢開拍此戲：「導演真係好愛電影，佢拍戲唔係為賺錢，係希望香港繼續有賀歲片，所以好敬重佢呢份心意，希望有好報，唔好蝕本無陰公。」

他表示MIRROR兄弟近日忙於拜年未睇戲，呼籲他們自動自覺買飛入場支持。自己同屋企人都看了兩次，父母看到眼濕濕，自言第二次睇有不同感受。問到會否第三次看會帶緋聞女友林明禎入場？笑言：「會同大家一齊睇！」他說看戲沒有喬裝需要，有觀眾認出會合照，希望睇到觀眾的真實反應，知道有粉絲看了電影5、6次，又有人一家11人一齊睇，非常多謝。之前謝票場他都有獻唱電影片尾曲，看觀眾反應，有需要會次次獻唱，又會叫鍾雪瑩唱，不過鍾雪瑩笑言只負責拍掌，她表示已看了電影兩次，聽到觀眾看了6次，覺得好犀利。對於電影排片不及《夜王》，Edan表示見到《金多寶》場次不多，希望有多些場次就好，又讚執行導演何爵天非常勤力宣傳，鍾雪瑩表示演員未試過開Live宣傳，覺得是不錯的提議。

金燕玲之前自陶腰包包場請多位導演看戲，包括徐克等，伴侶蘇施黃睇到好感動，許鞍華就睇到笑，之後會叫朋友買飛捧場，支持電影並非為自己，自言可以同這團隊合作感覺好幸福和開心，幕後團隊好辛苦，所以希望有收穫，「都唔知仲可以做乜嘢幫手，所以今年唯一願望希望電影可以番本最重要。」

導演翁子光表示對票房尚未滿意，但是預期中，雖然未算最好，但票房平穩上升，他說據過往電影開畫的經驗，初時票房都只是一般但之後便好，《金》已破了公司電影開劃一周最高票房紀錄，所以對票房有信心。導演今次是向行內朋友借錢開戲，若電影收3000萬便可回本，直言希望映期可以長些，透露排片比《夜》少3分1，唔敢講票房因此受影響，指票房都唔夠《夜》3分1，「唔係要爭，希望排到多啲人睇到，要再努力啲，只睇自己唔同人比較。」問他有沒有反映排片問題？他表示沒有，覺得大家都睇到，自言都有支持睇《夜》。

東網網站 : https://on.cc/東網Facebook專頁 : https://www.facebook.com/onccnews/