陳凱詠認紅館騷滯銷遭一沉百踩　大劈價$350有得睇？

女歌手陳凱詠（Jace）將於2月18日大年初二起在紅館舉行一連兩場《JACE WORLD》演唱會，尋日（12日）又暗示演唱會嘉賓為林家謙，谷行去宣傳。早前佢就被質疑唱功問題，令其賣飛數量不滯，雖然日前獲金牌音樂監製馮翰銘（Alex Fung）點名力撐，指其Live實力可被列入香港女歌手之中嘅Tier A（Vibe），不過似乎都挽救唔到網上劣評。

網上陸續湧現多個陳凱詠演唱會門票場外價格表，由原價$1080降至低位$800，原價$880位置更跌價至$350，黃牛黨大劈價為求甩手，有口臭網友更戲言要等到$200先肯交易。有網友就留言建議陳凱詠改為開麥花臣，不需堅持開紅館，亦有網友留言大鬧：「免費都要諗吓去唔去呀」、「依家呢個時勢 好多人畀60蚊入戲院睇都未必會 希望佢今次真係會學懂謙虛嘅重要性」、「送都唔去嘥車錢」、「可否定100 遲一個鐘入場 聽完林家謙即走」。不過都有網友戥佢被一沉百踩嘅情況好可憐。

面對諸多批評，陳凱詠紅館騷銷量明顯大受影響，佢今日（13日）凌晨發文，指佢理解大家話佢滯銷，不過佢唔用數字定義成功及音樂，叫大家留意佢對呢個舞台嘅尊重同誠意：「好多人話我滯銷，我理解。票房係現實，我唔會扮睇唔到。但我從來唔會只用數字定義成功定義音樂。既然我有幸踏上紅館呢個舞台，我一定會將所有資源放喺最好嘅音樂、排舞、舞台效果，同埋現場演出。如果你唔鍾意我，唔緊要，但如果你入場，希望你會感受到我對呢個舞台嘅尊重同誠意！」獲大批藝人留言力撐及鼓勵，如MIRROR成員Edan、Anson Kong、Stanley、ERROR成員193、C AllStar成員陳健安、游學修、吳林峰、梁祖堯、談善言、吳肇軒等。

東網網站 : https://on.cc/東網Facebook專頁 : https://www.facebook.com/onccnews/