《金多寶》觀後感　溫馨動人有笑有淚嘅賀歲片

剛剛步入馬年，我喺初一馬上就睇咗《金多寶》，完全無失望，係一部溫馨動人，有笑有淚嘅賀歲片，啱曬一家大細一齊入場！
（以下有劇透）

「快記住要怎回家那些期許容許如果將消退收於心裡」

故事設定幾有賀歲片味道，喺農曆年期間發生，劇情搞笑又帶點胡鬧，有賀歲喜慶嘅感覺，亦有眾多演員參與。將別墅誤打誤撞變做鬼屋，仲有唱《我的回憶不是我的》兩段都笑到我碌地。

「會怕做錯事卻做錯事全都不對特別鳴謝全部容讓而毫不怪罪」

不過，電影重點都係圍繞一家人嘅關係。由兩父女隱瞞嫲嫲無買六合彩開始，依家人經歷一趟特別嘅中金多寶之旅，雖然過程中有爭執不和，仲被揭穿謊言，但一家人齊齊整整地面對，拉近彼此關係，帶出滿滿溫情。由胡鬧開展，再感動地完結。

其實人生最珍貴嘅從來唔係金錢，而係同身邊人相處嘅時光。

「若談愛是我當然渺小你教會我兌現諾言人齊才重要」

電影拍攝上充滿懷舊味道，喺屋邨取景、Y2K年代攝影機嘅畫面，整個色調同燈光都好似睇緊以前嘅港產片。對香港電影致敬嘅橋段多不勝數，亦以拍攝電影橋段作開頭同結尾，係一份送比港產片影迷嘅禮物。客串陣容仲橫跨不同界別不同年代，觀影過程不斷有驚喜。

「這一次就算可能報銷沉默消化着海嘯期待一覺睡醒明白了」

電影選角相當合適，我好喜歡演員之間嘅火花同愛。

鍾雪瑩再次擔正，睇佢做戲簡直係一種享受，輕鬆搞笑同感情戲都游刃有餘；Edan好啱依個帶點喜劇元素嘅角色，演技比以往更成熟，帶嚟唔少笑點；金燕玲絕對係影后級演出，佢對子孫們嘅愛實在太偉大，令人動容；李尚正同蝦頭就唔駛講，每次見到佢地出場已經想笑。

「我要學會負責任也像你般清脆最後還未如願還是流露不怕累」

翁子光導演今次放低沉重題材，成功拍出另一種味道，感受到濃厚嘅個人情感。

然而，我都要承認電影有做得麻麻嘅地方。前段其實節奏幾好，但中後段開始有啲冗長同散，延續唔到之前嘅精彩。睇得出導演有好多野想講，雖然係深化到角色間嘅關係，但短返十分鐘左右感覺會更好。不過只係有啲美中不足，我係睇得舒服又開心，亦好欣賞《金多寶》嘅演員同故事。

「每一秒用我溫柔對焦潺弱的我被感召然後一覺睡醒無憾了」

經過去年成績平平嘅賀歲檔，我諗今年大家期望都唔敢太高。希望《金多寶》最後會有唔錯嘅票房，依班台前幕後值得一個肯定！

「無論天際或眼前遲鈍的我最想來日見」

娛樂