Ray Online｜立法會邀請青年色士風樂團表演 梁君彥笑言因懂吹色士風的盧偉國「都老啦」
立法會今日迎嚟午間音樂會，嚟自香港青年色士風樂團嘅中、小學生嚟到表演。立法會主席梁君彥話好開心見到一班新力軍，講笑話因為識吹色士風嘅議員盧偉國都老啦！
被點名嘅盧偉國不甘示弱，原來有備以來嘅，為咗答謝樂團，出動咗鑽石色士風演奏《You Raise Me Up》，話學生無論喺追逐音樂嘅路途，又或者係往後嘅人生、學業、事業、家庭遇到困難都可以互相激勵。
今日嘅表演以夢想為主題，演奏6首歌曲，包括迪士尼電影《獅子王》歌曲《Circle of Life》、電影 《阿拉丁》主題曲《A Whole New World》等等。梁君彥致辭嗰陣話香港係音樂之都，開心見到樂團用音樂鼓勵大家追逐夢想。佢讚揚一班學生年紀細細，已經有豐富嘅演出機會。雖然放緊暑假，但仍然為咗今次表演努力練習，就好似一班議員繼續努力處理同民生息息相關嘅工作。
為令學生與議員輕鬆交流
今次午間音樂表演屬於「與立法會議員暢談計劃」，梁君彥話立法會秘書處定期舉辦活動，目的係令學生同議員輕鬆交流，加深對立法會嘅認識。當然亦藉此提供更多演出機會，等同學展現音華才華。
睇完新聞，記得追蹤am730以下平台，接收最新、最啱你嘅消息！
Facebook：am730 (https://www.facebook.com/am730hk)
Instagram：am730hk (https://www.instagram.com/am730hk/)
YouTube：am730 (https://www.youtube.com/c/am730video)