盧瀚霆30歲生日前夕與神徒開P 望粉絲有被保護感覺

盧瀚霆（Anson Lo）明天（7日）30歲生日，今晚出席《Together We Celebrate》生日會與一眾神徒（粉絲暱稱）慶祝，又走落台與粉絲近距離接觸。一身粉紅的他在台上說︰「大家好嗎？食咗飯未呀？ 」台下傳來「未」的回答，Anson Lo繼續說︰「我都未，陣間先至食。好開心今年2025年嘅生日會，可以見到咁多位。我冇諗過今年係咁大規模，可以一次過見到咁多人，所以今年係好特別嘅一年。」

Anson Lo坦言大家毋須刻意以「29+1」代替「30」，因為他不介意「30」這個年齡數字。他說︰「我今年30歲啦，除咗愈嚟愈Man之外，我都覺得30歲係一個轉捩點。可能好多過往嘅挫敗、後悔、遺憾做唔到嘅嘢，我覺得要全部擺埋一邊先，勇往直前，向前去諗，向前行。30歲除咗事業之外，承擔感重咗好多，承擔住屋企人，照顧屋企嘅責任，亦都承擔住照顧神徒你哋每一位。可能大個咗，就更加想每一分、每一秒、每一個唔同嘅場合，甚至每一日都好想大家開心。你哋依靠住我嘅時候，亦都有一種被保護嘅感覺，所以希望大家今年生日會可以同我一齊have fun，開心啦，多謝﹗」

（即時娛樂）