娛圈單打︱女神配對是非多　食家更係多籮籮

TVB戀綜《女神配對計劃》開播以來話題不絕，最甜CP曾展望、葉蒨文成為最多觀眾支持嘅一對，大家除咗驚嘆Sophie身材索爆，仲覺得佢個性可愛唔作狀，唔似得其他娘娘一味收兵。GM更係不得了，口才了得，談吐得體，又愛講爛Gag搞吓笑，對Sophie一條心，難怪瞬間人氣急升！

至於另一甜度爆錶嘅CP林俊其、羅毓儀，男方向女神表白一幕感動不少觀眾，Yuki更係又喊又笑，沉晒船咁款。林俊其過去知名度不高，但曾經被踢爆，跟前港姐季軍梁超怡情侶裝撐枱腳，關係匪淺。雖然二人急急撇清關係，但既然被叫做「王浩信2.0」，會唔會連視帝嘅風流個性都似到十足，真係要觀察吓至知。Yuki咁快開晒綠燈，因住得個吉呀！

相對幾位「波霸級」女神，關嘉敏並非走性感路線，因此一直冇獲得太多關注。點不知因為Babyface被女神梁敏巧無情落閘，Carman見狀忍唔住灑下同情淚，獲網民大讚真性情，意外收穫不少人氣！Carman揚言冧爆「細John」、即係姜大衞個寶貝仔，最終會否有情人終成眷屬，不妨等着瞧。

嗱，梁敏巧就冇咁好彩啦，正因為佢熄咗Babyface盞燈，被網民狂轟無情，兼且就其樣貌進行猛烈抨擊，話佢個樣太成熟，似足40路，負皮不絕。屋漏偏逢連夜雨，敏巧心儀嘅十優狀元、年薪500萬嘅醫生參賽者，更被網民指控為「有特殊癖好嘅食家」，連口水佬林作都加入戰團，發起保護梁敏巧行動！嗚呀，雖然節目最緊要收視啫，但女神們，睇路呀！

東網網站 : https://on.cc/東網Facebook專頁 : https://www.facebook.com/onccnews/